മാർഗോ: ഈ വർഷത്തെ 37-ാമത് ദേശീയ ഗെയിംസ് പ്രധാനമന്ത്രി നരേന്ദ്ര മോദി ഇന്ന് ഉദ്ഘാടനം ചെയ്യും. ഗോവയിലെ മാർഗോയിൽ പണ്ഡിറ്റ് ജവഹർലാൽ നെഹ്‌റു സ്റ്റേഡിയത്തിൽ ഒക്ടോബർ 26 മുതൽ നവംബർ 9 വരെയാണ് ഗെയിംസ് നടക്കുന്നത്. ഉദ്ഘാടന ശേഷം പ്രധാനമന്ത്രി കായികതാരങ്ങളെ അഭിസംബോധന ചെയ്യും.
‘ 37-ാമത് ദേശീയ കായിക മാമാങ്കം ഉദ്ഘാടനം ചെയ്യാൻ ഞാൻ ഇന്ന് ഗോവയിൽ എത്തും. കളത്തിലെ മാന്യതയും ഐക്യം വർദ്ധിപ്പിക്കുന്നതിനൊപ്പം രാജ്യത്തിന്റെ വിവിധ ഭാഗങ്ങളിലുള്ള അത്ലറ്റുകളെ ഒരുമിപ്പിക്കുന്നതാകും ഗെയിംസ്. കഠിനാദ്ധ്വാനമുള്ള പ്രതിഭകളുടെ കഴിവുകളും കായിക രംഗത്തോടുള്ള അവരുടെ സ്നേഹവും ആഘോഷിക്കപ്പെടുന്ന ഒരു ഗെയിംസ് കൂടിയാകും ഇതെന്ന് എനിക്കുറപ്പുണ്ട്- പ്രധാനമന്ത്രി എക്സിൽ കുറിച്ചു.
ഗോവ ദേശീയ ഗെയിംസിന് ആതിഥ്യം വഹിക്കുന്നത് ആദ്യമാണ്. 28 വേദികളായി 43 കായിക ഇനങ്ങളിലായി പതിനായിരത്തിലധികം കായിക താരങ്ങൾ പങ്കാളികളാകും.
