ലണ്ടനിലെ ഉപരി പഠനം ഉപേക്ഷിക്കുന്നുവെന്ന് വെളിപ്പെടുത്തി നടി സാനിയ ഇയ്യപ്പൻ. മൂന്ന് വർഷം നീണ്ട് നിൽക്കുന്ന പഠനത്തിനിടയിൽ തതന്റെ കരിയറിന് വേണ്ടി ബ്രേക്ക് എടുക്കുകയാണെന്ന് താരം വെളിപ്പെടുത്തി. പഠനം ഉപേക്ഷിക്കുന്ന വിവരം സാനിയ ഇൻസ്റ്റഗ്രാമിലൂടെയാണ് ആരാധകരെ അറിയിച്ചത്. യുകെയിലെ യൂണിവേഴ്സിറ്റി ഫോര് ദി ക്രീയേറ്റീവ് ആര്ട്സ് എന്ന സര്വകലാശാലയിൽ സെപ്റ്റംബറിലായിരുന്നു സാനിയ ബിരുദ പഠനം ആരംഭിച്ചത്.
ബിഎ (ഓണേഴ്സ്) ആക്ടിങ് ആന്ഡ് പെര്ഫോമന്സ് എന്ന വിഷയമാണ് സാനിയ ഇയ്യപ്പന് ഉപരിപഠനത്തിനായി തിരഞ്ഞെടുത്തത്. പഠനത്തോടൊപ്പം തന്നെ സിനിമയും മുന്നോട്ടുകൊണ്ടുപോകാനായിരുന്നു സാനിയയുടെ തീരുമാനം. എന്നാൽ പഠനത്തിനിടെ ഇത് നടക്കില്ലെന്ന് വന്നതോടെയാണ് സാനിയ പഠനം ഉപേക്ഷിച്ച് സിനിമയിലേക്ക് തിരിച്ചുവരുന്നത്.
‘ഒരു വലിയ കഥ ചുരുക്കി പറയാം. ഉന്നത വിദ്യാഭ്യാസത്തിനായി ലണ്ടനിലേക്ക് ഞാൻ പോയി, പക്ഷേ സിനിമയോടുള്ള എന്റെ സ്നേഹത്തിന് മറ്റ് ചില പദ്ധതികളും ഉണ്ടായിരുന്നു. അദ്ധ്യയന ദിനങ്ങളും സിനിമയുടെ ഷെഡ്യൂളും തമ്മിൽ ക്ലാഷായി. ലീവും ലഭിക്കാതെ ഇരിക്കുന്ന സാഹചര്യം വന്നു. അതുകൊണ്ട് ഗിയർ മാറ്റാൻ സമയമായി. എന്റെ ഹൃദയം എവിടെയാണോ അവിടേക്ക് ഞാൻ തിരിച്ചു വരുന്നു.’- സാനിയ കുറിച്ചു.
ഇരുഗപട്രു എന്ന തമിഴ് ചിത്രമാണ് സാനിയയുടേതായി അവസാനമായി പുറത്തിറങ്ങിയ സിനിമ. ചിത്രത്തിൽ പ്രധാന കഥാപാത്രങ്ങളിൽ ഒന്നാണ് സാനിയ അവതരിപ്പിച്ചത്. മലയാളത്തിൽ നിവിൻ പോളി നായകനായ സാറ്റർഡേ നൈറ്റാണ് സാനിയയുടേതായി ഒടുവിൽ പുറത്തിറങ്ങിയ ചിത്രം. മലയാളത്തിലും തമിഴിലുമായി ഒരുപിടി ചിത്രങ്ങൾ സാനിയയുടേതായി അണിയറയിൽ ഒരുങ്ങുന്നതായാണ് വിവരം.
