കൊച്ചി : മനസ്സിൽ പുഴുവരിച്ചവർക്കും കണ്ണിൽ രാഷ്‌ട്രീയ തിമിരം ബാധിച്ചവർക്കുമാണ് മാദ്ധ്യമപ്രവർത്തകയുടെ തോളിൽ തട്ടിയ സംഭവത്തിൽ ആഭാസം കാണാൻ കഴിഞ്ഞേക്കുമെന്ന് നടിയും ഗായികയുമായ മഞ്ജുവാണി ഭാഗ്യരത്നം . സുരേഷ് ഗോപിയെ ഈ വിഷയത്തില്‍ പഴിചാരുന്നത് സങ്കടകരമാണെന്നും മഞ്ജുവാണി പറയുന്നു.
‘‘സങ്കടകരം. കഷ്ടം. മനസ്സിൽ പുഴുവരിച്ചു വ്രണം പൊട്ടിയൊലിക്കുന്നവർക്കും കണ്ണിൽ രാഷ്‌ട്രീയ തിമിരം ബാധിച്ചവർക്കും ഇവിടെ ആഭാസം കാണാൻ കഴിഞ്ഞേക്കും. ദുഃഖം തോന്നുന്നു. ഈ മനുഷ്യൻ എന്താണെന്ന് നിങ്ങൾക്കും അറിയാം. ചാനൽ പത്ര പ്രവർത്തകയുടെ തോളത്ത് ഒരു മകളോടെന്ന പോലെ കൈവെച്ചാൽ ആഭാസമാണെങ്കിൽ, കേരളത്തിലെ കപട പുരോഗമനവാദികളുടെ കുടുംബത്തിൽ അച്ഛൻ മകളെ സ്നേഹത്തോടെ സ്പർശിക്കുന്നില്ല എന്ന് വേണം മനസ്സിലാക്കാൻ . ഒരു പുരുഷൻ തെറ്റായ രീതിയിൽ ശരീരത്തിൽ തൊടുകയും, അത് സ്ത്രീ തിരിച്ചറിഞ്ഞു വളരെ ചെറിയ രീതിയിൽ പോലും പ്രതികരിച്ചാൽ തന്നെ ആ പ്രവൃത്തി ചെയ്ത പുരുഷൻ ഒന്ന് വിരളും. ഒരു സ്ത്രീ ആയത് കൊണ്ട് തന്നെയാണ് ഞാനീ പറയുന്നത്. ആ വീഡിയോയിൽ എവിടെയെങ്കിലും ഒരണുവിട അദ്ദേഹം ചൂളിയിട്ടുപോലുമുണ്ടോ?
വ്യക്തി ജീവിതം ഒരു തുറന്ന പുസ്തകമായിട്ടുള്ള സുരേഷ് ഗോപിയുടെ ശരീരഭാഷയിൽ വാത്സല്യം മാത്രമേ എനിക്ക് കാണാൻ സാധിച്ചിട്ടുള്ളു. അതും പിന്നിലൂടെ ഏതോ ഒരാൾ കയ്യിട്ട് ഫോട്ടോയ്‌ക്ക് പോസ് ചെയ്യുന്നതും തമ്മിൽ താരതമ്യം ചെയ്തു ഉത്തരം പറയാൻ ഞാൻ അന്ധയായ രാഷ്‌ട്രീയ പ്രവർത്തകയല്ല. നമ്മളൊക്കെ ആദ്യം മനുഷ്യരാവാനാണ് പഠിക്കേണ്ടത്.’’–മഞ്ജുവാണി കുറിച്ചു
