നിരവധി സീരിയലുകളിലൂടെ മലയാളികളുടെ മനസിൽ സ്ഥാനം നേടിയ നടി ഡോ. പ്രിയ അന്തരിച്ചു. ടെലിവിഷൻ താരം കിഷോർ സത്യയാണ് സമൂഹ മാദ്ധ്യമങ്ങളിലൂടെ മരണവാർത്ത പങ്കുവച്ചിരിക്കുന്നത്. 8 മാസം ഗർഭിണിയായിരുന്നു നടി. ഹൃദയസ്തംഭനമാണ് മരണകാരണമെന്നും കുഞ്ഞ് ഐസിയുവിലാണെന്നും കിഷോർ സത്യ പറഞ്ഞു. നടി രഞ്ജുഷ മേനോന്റെ മരണത്തിന്റെ ഞെട്ടൽ മാറുന്നതിനു മുന്നെയാണ് ഡോ.പ്രിയയുടെ അപ്രതീക്ഷിത വിയോഗം ഇപ്പോൾ സിനിമ-സീരിയൽ ലോകത്തെ തേടി എത്തിയിരിക്കുന്നത്.
കിഷോർ സത്യയുടെ ഫേസ്ബുക്ക് പോസ്റ്റ്
മലയാള ടെലിവിഷൻ മേഖലയിൽ നൊമ്പരപെടുത്തുന്ന ഒരു അപ്രതീക്ഷിത മരണം കൂടി. ഡോ. പ്രിയ ഇന്നലെ ഹൃദയ സ്തംഭനം മൂലം മരിച്ചു. 8 മാസം ഗർഭിണി ആയിരുന്നു. കുഞ്ഞ് ഐസിയുവിലാണ്.
മറ്റ് ആരോഗ്യ പ്രശ്നങ്ങൾ ഒന്നുമില്ലായിരുന്നു. ഇന്നലെ പതിവ് പരിശോധനകൾക്ക് ആശുപത്രിയിൽ പോയതാണ്. അവിടെവച്ച് പെട്ടന്ന് കാർഡിയാക് അറസ്റ്റ് ഉണ്ടാവുകയായിരുന്നു. ഏക മകളുടെ മരണം ഉൾകൊള്ളാനാവാതെ വിതുമ്പുന്ന അമ്മ. 6 മാസമായി എങ്ങും പോകാതെ പ്രിയയോടൊപ്പം സ്നേഹ കൂട്ടാളിയായി നിന്ന ഭർത്താവിന്റെ വേദന, ഇന്നലെ രാത്രിയിൽ ആശുപത്രിയിൽ ചെല്ലുമ്പോൾ കാണുന്ന കാഴ്ച മനസ്സിൽ സങ്കട മഴയായി. എന്ത് പറഞ്ഞ് അവരെ അശ്വസിപ്പിക്കും? വിശ്വാസികളായ ആ സാധു മനസുകളോട് എന്തിന് ദൈവം ഈ ക്രൂരത കാണിച്ചു?
മനസ് ചോദ്യങ്ങൾ ആവർത്തിച്ചുകൊണ്ടേയിരുന്നു. ഉത്തരം കിട്ടാത്ത ചോദ്യങ്ങൾ, രഞ്ജുഷയുടെ മരണ വാർത്തയുടെ ഞെട്ടൽ മാറും മുൻപ് അടുത്ത ഒന്നുകൂടി. 35 വയസ് മാത്രമുള്ള ഒരാൾ ഈ ലോകത്തുനിന്ന് പോകുമ്പോൾ ആദരാഞ്ജലികൾ എന്ന് പറയാൻ മനസ് അനുവദിക്കുന്നില്ല. ഈ തകർച്ചയിൽ നിന്നും പ്രിയയുടെ ഭർത്താവിനെയും അമ്മയെയും എങ്ങനെ കരകയറ്റും? അവരുടെ മനസുകൾക്ക് എല്ലാം സഹിക്കാനുള്ള ശക്തിയുണ്ടാവട്ടെ- കിഷോർ സത്യ കുറിച്ചു.
