പനിയുള്ളപ്പോൾ കാപ്പി കുടിക്കാൻ ഒരു പക്ഷേ നമ്മിൽ പലർക്കും ഇഷ്ടമായിരിരിക്കും.
ചുക്കു കാപ്പി, കട്ടൻ കാപ്പി, പാൽ കാപ്പി എന്നിവ കുടിക്കുന്നത് പനിയുള്ളപ്പോൾ ശരീരത്തിന് ഉന്മേഷം പകരുന്നതാണെങ്കിലും ഇത് ശരീരത്തിന് നല്ലതല്ലെന്നാണ് ആരോഗ്യ വിദഗ്ധർ പറയുന്നത്. പനിയുള്ള സമയത്ത് കഞ്ഞിവെള്ളമോ, ചൂടുവെള്ളമോ ഇടയ്ക്കിടെ കുടിക്കുന്നത് ക്ഷീണം അകറ്റാൻ സഹായിക്കും. രോഗമുള്ള സമയങ്ങളിൽ കാപ്പി കുടിക്കുന്നത് ഒഴിവാക്കണമെന്നു പറയുന്നതിന്റെ കാരണമെന്തായിരിക്കും? അറിയാം..
കാപ്പിയിൽ അടങ്ങിയിരിക്കുന്ന കഫൈൻ തന്നെയാണ് ഇതിന് പ്രധാന കാരണം. കഫൈൻ അടങ്ങിയ പാനീയങ്ങൾ പനിയോ മറ്റ് രോഗങ്ങളോ ഉള്ളപ്പോൾ കുടിക്കുന്നത് ഒഴിവാക്കാൻ ആരോഗ്യ വിദഗ്ധർ നിർദ്ദേശിക്കുന്നു. കാപ്പി കുടിക്കുമ്പോൾ ഉന്മേഷം ശരീരത്തിന് ലഭിക്കുമെങ്കിലും ഉറക്കം വരാതിരിക്കാൻ ഇത് കാരണമാകുന്നു. കൃത്യമായ ഉറക്കം രോഗബാധിതർക്ക് ലഭിച്ചില്ലെങ്കിൽ അത് ക്ഷീണത്തിലേക്കും മറ്റ് അസുഖങ്ങളിലേക്കും വഴിവയ്ക്കുന്നു. കൂടാതെ കാപ്പിയിലെ കഫൈൻ ശരീരത്തിലെ ജലാംശം വലിച്ചെടുത്ത് നിർജ്ജലീകരണത്തിന് വഴിയൊരുക്കുന്നു. ഇതും രോഗികളെ ഗുരുതരമായി ബാധിച്ചേക്കാം. ഇതുമൂലം പനിയോ മറ്റ് രോഗങ്ങളോ ഉള്ളപ്പോൾ കാപ്പികുടിക്കുന്നത് ഒഴിവാക്കണമെന്നാണ് വിദഗ്ധർ അഭിപ്രായപ്പെടുന്നത്.
