മണ്ഡലകാലവും ശബരിമലയിലേക്കുള്ള തീർത്ഥാടനവും ഏതൊരു ഭക്തന്റെയും വികാരമാണ്. രാജ്യത്തെ പ്രധാന തീർത്ഥാടന കേന്ദ്രങ്ങളിൽ പ്രശസ്തമാണ് ശബരിമലയും. ഭക്തിയ്ക്കൊപ്പം തന്നെ മലകയറുമ്പോഴുള്ള കാഴ്ചകളും വിസ്മയം തീർക്കുന്നവയാണ്. ക്ഷേത്രത്തിന് ചുറ്റും നിരവധി വിനോദസഞ്ചാര കേന്ദ്രങ്ങളാണ് ഉള്ളത്. അന്യസംസ്ഥാനങ്ങളിൽ നിന്നുൾപ്പെടെ വരുന്നവർക്ക് സന്നിധാനത്ത് നിന്ന് മടങ്ങുമ്പോൾ ഈ സ്ഥലങ്ങളും ആസ്വദിച്ച് മടങ്ങാവുന്നതാണ്. ഇവ ഏതെല്ലാമെന്ന് നോക്കാം…
പന്തളം കൊട്ടാരം
ഒരുപാട് ചരിത്രവും ഐതീഹ്യവും ഉറങ്ങുന്നിടമാണ് പന്തളം കൊട്ടാരം. അയ്യപ്പൻ ജനിച്ചു വളർന്ന ഇടം. ശബരിമല ക്ഷേത്രത്തിന് സമാനമായി പന്തളം രാജാവ് പണി കഴിപ്പിച്ച വലിയ കോയിക്കൽ ക്ഷേത്രവും സഞ്ചാരികൾക്ക് ഇവിടെ കാണാവുന്നതാണ്.
അച്ഛൻകോവിൽ ആറിന്റെ തീരത്തായി സ്ഥിതി ചെയ്യുന്ന ക്ഷേത്രം ശബരിമലയ്ക്ക് സമീപമുള്ള പ്രധാന തീർത്ഥാടന കേന്ദ്രങ്ങളിൽ ഒന്നാണ്.
ത്രിവേണി സംഗമം
ശബരിമലയിലേക്കുള്ള വഴിയാണ് ത്രിവേണി സംഗമം. ഇവിടെ ദക്ഷിണഗംഗ എന്നറിയപ്പെടുന്ന പമ്പാനദി വടക്കുവശത്ത് മണിമലയാറുമായും തെക്ക് വശത്ത് അച്ഛൻകോവിലാറുമായും കൂടിച്ചേരുന്നു.
പാർത്ഥസാരഥി ക്ഷേത്രം
ശബരിമലയ്ക്ക് സമീപമുള്ള പ്രശസ്തമായ ഒരു തീർത്ഥാടന കേന്ദ്രമാണ് പാർത്ഥസാരഥി ക്ഷേത്രം. ഐതിഹ്യപ്രകാരം ഈ ദിവ്യക്ഷേത്രത്തിൽ ആരാധിക്കുന്ന വിഗ്രഹം അർജ്ജുനൻ സ്ഥാപിച്ചതാണെന്നാണ് വിശ്വാസം. പാർത്ഥസാരഥി ക്ഷേത്രത്തിന് ചുറ്റുമുള്ള പ്രകൃതിദൃശ്യം മനോഹരമാണ്. പമ്പാ നദിയുടെ തീരത്താണ് ഇത് നിർമ്മിച്ചിരിക്കുന്നത്.
പെരുന്തേനരുവി വെള്ളച്ചാട്ടം
പത്തനംതിട്ട നഗരത്തിൽ നിന്ന് 36 കിലോമീറ്റർ അകലെ റാന്നിക്ക് സമീപം സ്ഥിതി ചെയ്യുന്ന മനോഹരമായ വെള്ളച്ചാട്ടമാണ് പെരുന്തേനരുവി. കോട്ടയം ജില്ലയിലെ എരുമേലിയിൽ നിന്ന് 10 കിലോമീറ്റർ പോയാലും ഇവിടെയത്തൊം.