കൊല്ക്കത്ത: ലോകകപ്പിൽ ഇന്ത്യ ഓസ്ട്രേലിയയോട് പരാജയപ്പെട്ടതില് മനം നൊന്ത് ആത്മഹത്യ ചെയ്ത് യുവാവ്. ബംഗാളിലെ ബങ്കുര ജില്ലയിലാണ് 23കാരൻ തൂങ്ങി മരിച്ചത്. ഞായറാഴ്ച രാത്രി ബെലിയേറ്റൂര് പോലീസ് സ്റ്റേഷൻ പരിധിയിലാണ് സംഭവം നടന്നത്.
പ്രദേശത്തെ ടെക്സ്റ്റയിൽസിൽ ജോലി ചെയ്തിരുന്ന യുവാവ് മത്സരം കാണുന്നതിനുവേണ്ടി ഞായറാഴ്ച അവധി എടുത്തിരുന്നു. എന്നാൽ, മത്സരത്തിൽ ഇന്ത്യ തോൽക്കുകയും ഓസ്ട്രേലിയ ജയിക്കുകയും ചെയ്തതോടെ ഇയാൾ റൂമിൽ കയറി കതക് അടയ്ക്കുകയായിരുന്നു. പിന്നാലെ ആത്മഹത്യയും ചെയ്തുവെന്ന് ഭാര്യാസഹോദരന് ഉത്തം സുര് പറഞ്ഞു. മറ്റൊരു പ്രശ്നങ്ങളും അവനുണ്ടായിരുന്നില്ലെന്നും അദ്ദേഹം കൂട്ടിച്ചേർത്തു.
മൃതദേഹം പോസ്റ്റ്മോര്ട്ടത്തിനായി തിങ്കളാഴ്ച രാവിലെ മെഡിക്കല് കോളേജ് ആശുപത്രിയിലേക്ക് അയച്ചു. അസ്വാഭാവിക മരണത്തിന് കേസെടുത്തതായി പോലീസ് അറിയിച്ചു.
