തിരുവനന്തപുരം: കേരള രാജ്യാന്തര ചലച്ചിത്രമേളയുടെ മീഡിയ ഡ്യൂട്ടി പാസിന് വേണ്ടിയുള്ള ഓൺലൈൻ രജിസ്ട്രേഷൻ നാളെ ആരംഭിക്കും. തിരുവനന്തപുരത്ത് 15 വേദികളിലായി ഡിസംബർ ഒമ്പത് മുതൽ 15 വരെയായിരിക്കും മേള നടക്കുക. റിപ്പോർട്ടിംഗിന് വേണ്ടി എത്തുന്ന മാദ്ധ്യമപ്രവർത്തകർക്കായി നിശ്ചിത ശതമാനം പാസുകൾ നീക്കി വെച്ചിട്ടുണ്ട്.
മാനദണ്ഡങ്ങളുടെ അടിസ്ഥാനത്തിലായിരിക്കും അച്ചടി-ദൃശ്യ-ശ്രവ്യ ഓൺലൈൻ മാദ്ധ്യമങ്ങൾക്ക് പാസ്സുകൾ അനുവദിക്കുക. ചലച്ചിത്ര മേള റിപ്പോർട്ട് ചെയ്യുന്നതിന് സ്ഥാപനം നിയോഗിക്കുന്ന മാദ്ധ്യമപ്രവർത്തകർക്കും കൂടാതെ ഫീസ് അടച്ച് മീഡിയ വിഭാഗത്തിൽ രജിസ്റ്റർ ചെയ്തവർക്കുമാകും ഫോട്ടോ പതിച്ച ഐഡി കാർഡുകൾ നൽകുന്നത്. എന്നാൽ ഡ്യൂട്ടി പാസ്സിന് ഫീസ് ഈടാക്കില്ല.
ബ്യൂറോ മേധാവികൾ ലെറ്റർ പാഡിൽ മേളയുടെ മുഖ്യവേദിയായ ടാഗോർ തിയേറ്ററിൽ പ്രവർത്തിക്കുന്ന മീഡിയാസെല്ലിൽ നൽകുന്ന ലിസ്റ്റ് അനുസരിച്ചു മാത്രമേ ഓരോ സ്ഥാപനത്തിനും അനുവദിക്കപ്പെട്ട പാസ്സുകൾ നൽകുകയുള്ളൂ. ലിസ്റ്റിൽ പറയുന്നവർ നിശ്ചിത തീയതിക്കുള്ളിൽ ഓൺലൈൻ മുഖേന പ്രൊഫൈൽ ക്രിയേറ്റ് ചെയ്തിരിക്കണം. ttps://registration.iffk.in/ എന്ന വെബ്സൈറ്റിൽ പ്രൊഫൈൽ ക്രിയേറ്റ് ചെയ്ത ശേഷം ലഭിക്കുന്ന പ്രൊഫൈൽ നമ്പറും ചേർത്താകണം അപേക്ഷ സമർപ്പിക്കേണ്ടത്.
