ബെന്യാമിന്റെ നോവലിനെ അടിസ്ഥാനമാക്കി ബ്ലെസി-പൃഥിരാജ് കൂട്ടുകെട്ടിലൊരുങ്ങുന്ന സിനിമയാണ് ആടുജീവിതം. ഇപ്പോൾ ചിത്രത്തിന്റെ റിലീസ് തീയതി പ്രഖ്യാപിച്ചിരിക്കുകയാണ് അണിയറപ്രവർത്തകർ.
2024 ഏപ്രില് 10 ന് ചിത്രം ലോകമെമ്പാടുമുള്ള തിയേറ്ററുകളില് എത്തും. മലയാളത്തിന് പുറമെ മറ്റ് ഭാഷകളിലും ചിത്രം റിലീസ് ചെയ്യും. സമൂഹമാദ്ധ്യമങ്ങളിലൂടെയാണ് റിലീസ് ഡേറ്റ് പുറത്ത് വിട്ടിരിക്കുന്നത്. നജീബ് എന്ന കഥാപാത്രത്തെയാണ് പൃഥിരാജ് അവതരിപ്പിക്കുന്നത്. ചിത്രത്തിനായി ഗംഭീര രൂപമാറ്റമാണ് പൃഥിരാജ് വരുത്തിയത്.
ആടുജീവിതത്തിന്റെ ചിത്രീകരണം പൂർത്തിയാക്കാൻ 160 ദിവസം വേണ്ടി വന്നിരുന്നു. നാലര വര്ഷം കൊണ്ടാണ് ഈ 160 ദിവസങ്ങൾ ബ്ലെസിക്ക് കണ്ടെത്തേണ്ടി വന്നത്. മരുഭൂമിയിലെ ചിത്രീകരണവും കൊറോണ മഹാമാരിയുമാണ് സിനിമയുടെ ചിത്രീകരണത്തിന് പ്രധാനമായും വിലങ്ങുതടി ആയത്. പൃഥ്വിരാജിനെ കൂടാതെ അമലാപോളും ശോഭാ മോഹനുമാണ് മലയാളത്തില് നിന്നുള്ള മറ്റു താരങ്ങള്. എ.ആര്. റഹ്മാനാണ് സംഗീതം നിര്വഹിക്കുന്നത്. കെ.എസ്. സുനിൽ- ഛായാഗ്രഹണം. പ്രശാന്ത് മാധവ് -കലാസംവിധാനം.
