സനാധന ധർമ്മത്തിന്റെ പാലകനായ അവതാര പുരുഷൻ, ഭാരതീയ ഇതിഹാസമായ രാമായണത്തിലെ കഥാനായകൻ, മഹാവിഷ്ണുവിന്റെ ഏഴാമത്തെ അവതാരം. ഭഗവാൻ ശ്രീരാമനെ ആരാധിക്കുന്നത് വിവിധ രൂപത്തിലും ഭാവത്തിലുമാണ്. ഭാരതീയരുടെ അഭിമാനമായി രാമക്ഷേത്രവും അയോദ്ധ്യയുടെ മണ്ണിൽ ഉയരുകയാണ്.
ഉത്തർപ്രദേശിലെ ഹൃദയഭാഗത്ത് മാത്രമല്ല, അങ്ങ് തായ്ലൻഡിലും അയോദ്ധ്യയുണ്ട്. സ്ഥലത്തിന് മാത്രമല്ല, അവിടുത്തെ രാജാക്കന്മാരുടെ പേരിനൊപ്പവും രാമൻ എന്ന സ്ഥാനപ്പേര് ചേർക്കുന്നു. തായ്ലൻഡിന്റെ ചരിത്രത്തിലും സംസ്കാരത്തിലും രാമൻ എന്ന ശീർഷകത്തിന് എത്രത്തോളം പ്രാധാന്യമുണ്ടെന്ന് തെളിക്കുന്നത് ഈ പാരമ്പര്യത്തിലൂടെയാണ്. “അയുത്തായ” (Ayutthaya) എന്നാണ് ഇവിടുത്തെ അയോദ്ധ്യ അറിയപ്പെടുന്നത്. പ്രദേശത്തിന് പ്രത്യേക രാജവംശവുമുണ്ട്. എല്ലാ രാജാക്കന്മാരെയും രാമനെ പോലെയാണ് കാണുന്നത്. ഈ പാരമ്പര്യം അവരുടെ സംസ്കാരവും ചരിത്രവുമായ ഇഴച്ചേർന്ന് കിടക്കുകയാണ്.
പൂർവികരെയും അസ്ഥിത്വത്തെയും പാരമ്പര്യത്തെയും ഇന്നത്തെ തലമുറയും വിസ്മരിച്ചിട്ടില്ല. ഇന്ത്യയിലെ അയോദ്ധ്യയും തായ്ലൻഡിലെ അയോദ്ധ്യയും തമ്മിലുള്ള സാമ്യവും അതുതന്നെയാണ്. വർഷങ്ങൾക്കിപ്പുറവും ഭാരതീയരെ പോലെ തന്നെ തായ്ലൻഡിലെ ജനങ്ങളും ശ്രീരാമനെ ആരാധിക്കുന്നു. ഹിന്ദു ക്ഷേത്രങ്ങളും അയുത്തായ നഗരത്തിൽ പണി കഴിപ്പിച്ചിട്ടുണ്ട്. അയുത്തയിലെ രാജാക്കന്മാർ ‘രാമതിബോധി’ അല്ലെങ്കിൽ “ഭഗവാൻ രാമ” എന്നാണ് അറിയപ്പെട്ടിരുന്നത്. രാമായണത്തിലും ഇതേ നാമം പരാമർശിക്കുന്നുണ്ട്. “രാംകീൻ” എന്നറിയപ്പെടുന്ന തായ് മതഗ്രന്ഥത്തിന് രാമായണത്തിന് തുല്യമായ പദവിയുണ്ട്. ഈ ഗ്രന്ഥവും വാല്മീകി രാമായണവും തമ്മിലുള്ള താരതമ്യ വിശകലനം ‘300 രാമായണ’ത്തിന്റെ രചയിതാവായ രാമാനുജൻ വരച്ചിട്ടുണ്ട്. 18-ാം നൂറ്റാണ്ടിൽ രാമ ഒന്നാമൻ രാജാവ് രചിച്ചതാണ് രാംകീൻ എന്നാണ് വിശ്വസിക്കുപ്പെടുന്നത്.
എഡി 1351 മുതൽ സയാമീസ് ഭരണാധികാരികളുടെ പ്രധാന നഗരമായിരുന്നു അയുത്തയ. 1767-ൽ, ബർമീസ് സൈന്യം അയുത്തായയെ കൊള്ളയടിക്കുകയും ഏതാണ്ട് പൂർണ്ണമായും നശിപ്പിക്കുകയും ചെയ്തു. വൈവിധ്യവും ചരിത്രവും അടയാളപ്പെടുത്തിയ പുണ്യനഗരത്തെ നശിപ്പിക്കാൻ ഇത് കാരണമായി. എന്നിരുന്നാലും അയുത്തായ നഗരത്തെ ജനങ്ങൾ പുനരുജ്ജീവിപ്പിച്ചു. സമ്പന്നമായ സാംസ്കാരികവും ചരിത്രപരവുമായ പ്രാധാന്യവുമുള്ള തായ് അയോദ്ധ്യ യുനെസ്കോയുടെ ലോക പൈതൃക പട്ടികയിലും ഇടം നേടിയിട്ടുണ്ട്.