ആമസോണിന്റെ പ്രോജക്ട് കയ്പർ ഉപഗ്രഹ നെറ്റ്വർക്കിന് വേണ്ടിയുള്ള ഉപഗ്രഹ വിക്ഷേപണം സാധ്യമാകുക സ്പേസ് എക്സിന്റെ ഫാൽക്കൺ 9 റോക്കറ്റിൽ. സ്പേസ് എക്സിന്റെ ഭാഗമായ മൂന്ന് റോക്കറ്റുകളാണ് ആമസോൺ പദ്ധതിയ്ക്ക് വേണ്ടി ബുക്ക് ചെയ്തിരിക്കുന്നത്. ലോ എർത്ത് ഓർബിറ്റിലേക്ക് 3,236 ഉപഗ്രഹങ്ങൾ വിക്ഷേപിച്ച് കയ്പർ ഉപഗൃഹ ശൃംഖല വിന്യസിക്കുന്നതിനാണ് ആമസോൺ പദ്ധതിയിടുന്നത്.
സ്പേസ് എക്സിന്റെ സ്റ്റാർലിങ്കിന് സമാനമായി ഉപഗ്രഹ ബ്രോഡ്ബാൻഡ് ഇന്റർനെറ്റ് സേവനം ഉറപ്പുവരുത്തുന്നതിനുള്ള പദ്ധതിയാണ് ആമസോണിന്റെ പ്രോജക്ട് കയ്പർ. സ്റ്റാർലിങ്കിന് ഇതിനോടകം തന്നെ മികച്ച സേവനം ഉറപ്പു വരുത്തുന്നതിനായി 5,000 ഉപഗ്രഹങ്ങൾ ഭ്രമണപഥത്തിലുണ്ട്.
2019-ലാണ് ആമസോൺ പ്രോജക്ട് കയ്പർ പദ്ധതി പ്രഖ്യാപിച്ചത്. 1,000 കോടി ഡോളറിന്റെ പദ്ധതിയാണ് ആദ്യ ഘട്ടത്തിൽ പ്രഖ്യാപിച്ചത്. ഫാൽക്കൺ 9 റോക്കറ്റുകളിൽ എത്ര ഉപഗ്രഹങ്ങൾ വിക്ഷേപിക്കുമെന്നത് വെളിപ്പെടുത്തിയിട്ടില്ല. 2025 പകുതിയോടെ ഉപഗ്രഹ വിക്ഷേപണം ആരംഭിക്കും.
