തിരുവനന്തപുരം: പ്രധാനമന്ത്രിയുടെ ജനകീയ നയങ്ങളും വികസന പദ്ധതികളും ഫലം കണ്ടു. കോൺഗ്രസിന്റെ കയ്യൊടിച്ച് നാലിൽ മൂന്നും ബിജെപി പിടിച്ചെടുത്തു. കോൺഗ്രസ് നേരിട്ട പരാജയത്തിൽ ഉപദേശവുമായി എത്തിയിരിക്കുകയാണ് ടൂറിസം മന്ത്രി മുഹമ്മദ് റിയാസ്. ഭരിക്കുന്ന സംസ്ഥാനങ്ങളിൽ പോലും ബിജെപിക്കെതിരെ നിലകൊള്ളാൻ കോൺഗ്രസിന് സാധിക്കുന്നില്ലെന്ന് അദ്ദേഹം പറഞ്ഞു. ബിജെപിയുടെ അണ്ടർ കവർ ഏജന്റുമാരായി കോൺഗ്രസുകാർ മാറുകയാണെന്നും അതാണ് പരാജയത്തിന് കാരണമെന്നാണ് മന്ത്രിയുടെ കണ്ടെത്തൽ.
കേരളത്തിലെ കോൺഗ്രസാണെങ്കിൽ ബിജെപിക്കെതിരെ നിലപാട് എടുക്കുന്ന സിപിഎമ്മിനെ തകർക്കാനാണ് ശ്രമിക്കുന്നത്. കോൺഗ്രസിന്റെ ഈ പുറകോട്ട് പോക്ക് ദൗർഭാഗ്യകരമാണ്. പാഠം ഉൾക്കൊണ്ട് കോൺഗ്രസ് മുന്നോട്ട് പോവണം. തമ്മിലടി അവസാനിപ്പിക്കാനും മതനിരപേക്ഷ നിലപാട് സ്വീകരിക്കാനും കോൺഗ്രസ് തയ്യാറാകണമെന്നും റിയാസ് ഉപദേശം നൽകുന്നു.
ലോക്സഭ തിരഞ്ഞെടുപ്പിന് മുന്നോടിയായുള്ള സെമിഫൈനൽ എന്ന് വിശേഷിപ്പിക്കപ്പെടാവുന്ന തിരഞ്ഞെടുപ്പ് ഫലം പുറത്തുവരുമ്പോൾ ആത്മവിശ്വാസം ചോരാതെ ചങ്കുറപ്പോടെയാണ് ബിജെപി നിലകൊള്ളുന്നത്. മധ്യപ്രദേശിൽ 161 സീറ്റിലും രാജസ്ഥാനിൽ 113, ഛത്തീസ്ഗഡിൽ 53 എന്നിങ്ങനെയാണ് ബിജെപിയുടെ മുന്നേറ്റം. ആകെയുള്ള രണ്ട് കനലും കെട്ടു കെട്ടിരിക്കുന്നതിന്റെ ദുഃഖത്തിലാണ് സിപിഎം.
