ഇന്ത്യയിലെ ഐഫോൺ നിർമ്മാണ കമ്പനിയായ വിസ്‌ട്രോൺ ഏറ്റെടുത്തതിന് പിന്നാലെ രാജ്യത്ത് ഐഫോൺ പ്ലാന്റുകൾ നിർമ്മിക്കാൻ ഒരുങ്ങി ടാറ്റ ഗ്രൂപ്പ്. ദക്ഷിണേന്ത്യയിൽ ഐഫോൺ നിർമ്മാണം വർദ്ധിപ്പിക്കുന്നതിന് വേണ്ടിയാണ് ഈ പദ്ധതി. പദ്ധതിയെ കുറിച്ചുള്ള ഔദ്യോഗിക പ്രഖ്യാപനം ഇതുവരെ നടന്നിട്ടില്ല. തമിഴ്‌നാട്ടിലെ ഹൊസൂർ എന്ന സ്ഥലത്താണ് പ്ലാന്റ് നിർമ്മിക്കുന്നത്. 20 ഘട്ടങ്ങളിലായിട്ടാണ് പ്ലാന്റിന്റെ നിർമ്മാണം നടക്കുക. കൂടാതെ രണ്ട് വർഷത്തിനുള്ളിൽ 50,000 ആളുകൾക്ക് ജോലി സാധ്യതയും നൽകുന്നുണ്ട്.
12 മുതൽ 18 മാസത്തിനുള്ളിൽ പദ്ധതി നടപ്പിലാക്കുമെന്നാണ്് പുറത്ത് വരുന്ന റിപ്പോർട്ടുകൾ. ആപ്പിൾ കമ്പനിയുടെ വിതരണ ശൃംഖല വിപുലീകരിക്കുന്നതിനും രാജ്യത്ത് ടാറ്റയുമായുള്ള ബന്ധം കൂടുതൽ മെച്ചപ്പെടുത്തുന്നതിനും ഈ പുതിയ പദ്ധതി സഹായകമാവും. കർണാടകയിൽ നിലവിലുള്ള ഐഫോൺ നിർമ്മാണ കമ്പനിയായ വിസ്‌ട്രോൺ ടാറ്റ ഗ്രൂപ്പ് ഏറ്റെടുത്തിരുന്നു.
ഇതുവഴി കൂടുതൽ ഫോൺ ഉല്പാദനം വർദ്ധിപ്പിക്കാൻ സാധിക്കും. കൂടാതെ രാജ്യത്ത് 100 ആപ്പിൾ റീട്ടെയിൽ സ്റ്റോറുകൾ ആരംഭിക്കുമെന്ന് ടാറ്റ ആദ്യമെ അറിയിച്ചിരുന്നു. ഇതിന്റെ ഭാഗമായി മുംബൈയിൽ രണ്ട് ആപ്പിൾ സ്റ്റോറുകൾ ആരംഭിച്ചിട്ടുണ്ട്. ഇനി മൂന്നെണ്ണം ആരംഭിക്കാൻ ഒരുങ്ങുകയുമാണ്.
