ഡിസംബർ മാസം എന്നു പറയുമ്പോഴേ നമ്മുടെ മനസിൽ ആദ്യം ഓടി എത്തുന്നത് മഞ്ഞ് പെയ്യുന്ന രാവുകളും ക്രിസ്മസ് പുലരിയുമൊക്കെയാവും. സിനിമകളിലും സമൂഹമാദ്ധ്യമങ്ങളിലെ വീഡിയോകളിലുമൊക്കെ പല വിദേശ സ്ഥലങ്ങളിൽ മഞ്ഞുപെയ്യുന്നത് കാണുമ്പോൾ ഇതൊന്ന് നേരിട്ട് കാണാൻ ആഗ്രഹിച്ചവരായിരിക്കും നമ്മിൽ പലരും. ഇതു കാണാനായി ഈ രാജ്യങ്ങളിലേക്ക് പോകാൻ സാധിക്കോ? ഇല്ലെങ്കിലും ഇനി വിഷമിക്കേണ്ട മഞ്ഞുവീഴ്ചയ്ക്ക് പേരുകേട്ട ഇടങ്ങൾ നമ്മുടെ ഇന്ത്യയിൽ തന്നെയുണ്ട്. അതിൽ നമ്മുടെ കൊച്ചു കേരളവും ഉൾപ്പെടുന്നു. അറിയാം..
മൂന്നാർ
മഞ്ഞു വീഴ്ച കാണാൻ ആഗ്രഹിക്കുന്നവർക്ക് മൂന്നാറിൽ ഈ അവധിക്കാലം ആഘോഷിക്കാം. പൊതുവെ മൂന്നാറിലെ മഞ്ഞുവീഴ്ച ലഘുവാണെങ്കിലും തണുപ്പ് കൂടുതലുള്ള സമയങ്ങളിൽ ഇവിടയെത്തുന്നവർക്ക് മഞ്ഞ് പെയ്യുന്നത് കാണാൻ സാധിക്കും.
ജമ്മു-കശ്മീർ
ഭൂമിയിലെ പറുദ്ദീസ എന്നറിയപ്പെടുന്ന ജമ്മു കശ്മീർ മഞ്ഞു വീഴ്ചയ്ക്ക് പേരുക്കേട്ട സ്ഥലമാണെന്ന് എല്ലാവർക്കും അറിയാം. ഡിസംബർ മാസത്തിൽ അതി കഠിനമായ മഞ്ഞുവീഴ്ചയാണ് ഇവിടെ അനുഭവപ്പെടാറുള്ളത്. ശ്രീനഗർ, ഗുൽമാർഗ്, പഹൽഗാം എന്നീ പ്രദേശങ്ങൾ വിനോദസഞ്ചാരികളെ മഞ്ഞുപെയ്യുന്നത് കാണാനായി ആകർഷിക്കുന്നു. മഞ്ഞുമൂടിയ ദാൽ തടാകത്തിന്റെ അതിമോനഹര കാഴ്ചകളും വിനോദസഞ്ചാരികളെ ഇവിടേക്ക് ആകർഷിക്കുന്നു.
ഷിംല, മണാലി
ഹിമാചൽപ്രദേശിന്റെ തലസ്ഥാനമായ ഷിംലയാണ് മറ്റൊരിടം. കൊളോണിയൽ കാലഘട്ടത്തിന്റെ ചില അവേശിപ്പുകൾ നമുക്കിവിടെ കാണാൻ സാധിക്കും. കുഫ്രി മേഖലയിലെത്തുന്ന വിനോദസഞ്ചാരികൾക്ക് മഞ്ഞുവീഴ്ച ആസ്വദിക്കാനും സാധിക്കുന്നു. ഷിംലയിൽ നിന്നും കുറച്ചു നേരം യാത്ര ചെയ്താൽ മണാലിയിൽ എത്തിച്ചേരാൻ നിങ്ങൾക്ക് സാധിക്കും. ഇവിടുത്തെ മഞ്ഞുവീഴ്ചയും വിനോദസഞ്ചാരികൾക്ക് കണ്ണിന് കുളിരേകുന്നു.
ഉത്തരാഖണ്ഡ്
മഞ്ഞുവീഴ്ചയ്ക്ക് പേരുകേട്ടയിടമാണ് ഉത്തരാഖണ്ഡ്. മഞ്ഞിൽ കുളിച്ചു നിൽക്കുന്ന ബദരീനാഥ് ക്ഷേത്രം വിശ്വാസികളെപോലെ തന്നെ വിനോദസഞ്ചാരികളെയും ഇവിടേക്ക് ആകർഷിക്കുന്നു. മഞ്ഞുമൂടിയ കൊടുമുടികളും പാതകളും നിങ്ങൾക്ക് ഇവിടെ കാണാം.
