മലയാളത്തിന്റെ ഓസ്കാർ പ്രതീക്ഷയാണ് ജൂഡ് ആന്റണി ജോസഫിന്റെ ‘2018 എവരിവൺ ഈസ് എ ഹീറോ’. 2018-ലെ പ്രളയത്തിന്റെ യഥാർത്ഥ മുഖം പ്രേക്ഷകരിലേക്ക് എത്തിച്ച ചിത്രത്തിന് മികച്ച സ്വീകാര്യതയാണ് ലഭിച്ചത്. മലയാളത്തിൽ നിന്നും മികച്ച ഇന്റർനാഷണൽ ഫീച്ചർ ഫിലിമിനുള്ള ഓസ്കാർ എൻട്രിയായി ചിത്രത്തെ തിരഞ്ഞെടുത്തിട്ടുണ്ട്. ഇതിന്റെ ഭാഗമായി സംവിധായകൻ ജൂഡ് ആന്റണി നിലവിൽ അമേരിക്കയിലാണുള്ളത്.
ഓസ്കാർ പരുസ്കാരങ്ങൾ വിതരണം ചെയ്യുന്ന ഡോൾബി തിയേറ്ററിൽ നിന്നുമുള്ള ചിത്രങ്ങൾ പങ്കുവച്ചിരിക്കുകയാണ് ജൂഡ് ആന്റണി. താൻ ഏറെ കാത്തിരിക്കുന്ന നിമിഷത്തെ കുറിച്ച് ഏറെ വൈകാരികമായ കുറിപ്പോടെയാണ് അദ്ദേഹം ചിത്രങ്ങൾ പങ്കുവച്ചിരിക്കുന്നത്.
‘2024 മാർച്ച് 10-ന് മികച്ച ഇന്റർനാഷണൽ ഫീച്ചർ ഫിലിമിനുള്ള ഓസ്കാർ പുരസ്കാരം കരസ്ഥമാക്കി ഈ വേദിയിൽ നിൽക്കാൻ ദൈവവും ഈ ലോകവും എന്റെ കൂടെ വേണം. ആ ദിവസത്തിനായി ഞാൻ കാത്തിരിക്കുകയാണ്’. സമൂഹമാദ്ധ്യമമായ ഇൻസ്റ്റഗ്രാമിൽ ജൂഡ് ആന്റണി കുറിച്ചു.
View this post on Instagram
നിരവധി ആളുകളാണ് അദ്ദേഹത്തിന് ആശംസകളുമായി എത്തിയിരിക്കുന്നത്. ഇന്ത്യൻ ബിഗ് സ്ക്രീനിൽ മാത്രമല്ല ലോകത്തെ പല തിയേറ്ററുകളിലും മികച്ച വിജയം കൈ വരിക്കാൻ 2018-ന് കഴിഞ്ഞിരുന്നു. ടൊവിനോ തോമസ്, ആസിഫ് അലി, കുഞ്ചാക്കോ ബോബൻ, ലാൽ തുടങ്ങി നിരവധി താരങ്ങളെ കോർത്തിണക്കിയ ചിത്രമായിരുന്നു ‘2018 എവരിവൺ ഈസ് എ ഹീറോ’.
