ന്യൂഡൽഹി: ഗവർണറുടെ കാർ എസ്എഫ്ഐ പ്രവർത്തകർ ആക്രമിച്ച സംഭവത്തിൽ പ്രതികരണവുമായി ബിജെപി കേരള പ്രഭാരി പ്രകാശ് ജാവദേക്കർ എംപി. വിഷയത്തിൽ മുഖ്യമന്ത്രി പിണറായി വിജയൻ ഇടപെടണമെന്നും വളരെ അപകടകരമായ കാര്യമാണ് നടന്നതെന്നും അദ്ദേഹം പറഞ്ഞു. എസ്എഫ്ഐ പ്രവർത്തകരുടെ ഇത്തരത്തിലെ ആക്രമണങ്ങൾക്ക് നേരെ ജനങ്ങൾ ശബ്ദമുയർത്തണമെന്നും അദ്ദേഹം കൂട്ടിച്ചേർത്തു. ഡൽഹിയിൽ മാദ്ധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.
‘ഇത് വളരെ അപകടകരമാണ്… കേരള മുഖ്യമന്ത്രി പിണറായി വിജയൻ ഉടൻ വിഷയത്തിൽ നടപടിയെടുക്കണം, ജനങ്ങൾ ശബ്ദമുയർത്തണം.’ എന്നായിരുന്നു പ്രകാശ് ജാവദേക്കർ പറഞ്ഞത്.
രാജ്ഭവനിൽ നിന്നും എയർപോർട്ടിലേക്ക് പോകുന്ന വഴിയിലാണ് ഗവർണർ ആരിഫ് മുഹമ്മദ് ഖാനെ അപായപ്പെടുത്താൻ എസ്എഫ്ഐ ഗുണ്ടകൾ ശ്രമിച്ചത്. തിരുവനന്തപുരം യൂണിവേഴ്സിറ്റി കോളേജിന് സമീപത്തും ജനറൽ ആശുപത്രിക്ക് സമീപത്തും പേട്ട പള്ളിമുക്കിലുമായിരുന്നു ഗവർണരെ എസ്എഫ്ഐക്കാർ ആക്രമിക്കാൻ ശ്രമിച്ചത്.
