‘ബംഗ്ലാദേശിലെ ഹിന്ദുക്കൾ നമ്മൾ ഉപേക്ഷിച്ച ഇന്ത്യക്കാർ’ ദീപ് ഹൽദാർ രചിച്ച “ബീയിംഗ് ഹിന്ദു ഇൻ ബംഗ്ലാദേശ്: ആൻ അൺടോൾഡ് സ്റ്റോറി” പ്രകാശനം ചെയ്തു

ന്യൂഡൽഹി: ബംഗ്ലാദേശിലെ ന്യുനപക്ഷമായ ഹിന്ദുക്കൾ അനുഭവിക്കുന്ന വംശീയ ഉന്മൂലനത്തിന്റെ വസ്തുതകൾ ചർച്ച ചെയ്യുന്ന പുസ്തകം
“ബീയിംഗ് ഹിന്ദു ഇൻ ബംഗ്ലാദേശ്: ആൻ അൺടോൾഡ് സ്റ്റോറി” പ്രകാശനം ചെയ്തു. ദീപ് ഹൽദാർ, അവിഷേക് ബിശ്വാസ് എന്നിവരാണ് രചയിതാക്കൾ

സുപ്രസിദ്ധ സാമ്പത്തിക ശാസ്ത്രജ്ഞനും എഴുത്തുകാരനുമായ സഞ്ജീവ് സന്യാലും ThePrint-ന്റെ എഡിറ്റർ-ഇൻ-ചീഫ് ശേഖർ ഗുപ്തയുമാണ് പ്രകാശനം നിർവഹിച്ചത്.

ബംഗ്ലാദേശ് സമൂഹത്തിൽ ഹിന്ദുക്കളുടെ സ്ഥാനത്തെ കുറിച്ച് ചടങ്ങിൽ ചർച്ച നടത്തി.ബംഗ്ലാദേശിലെ ഹിന്ദു ന്യൂനപക്ഷങ്ങളുടെ ദുരവസ്ഥയെക്കുറിച്ച് ചർച്ച ചെയ്യുന്നതിനിടെ അവിടുത്തെ ഹിന്ദുക്കൾക്ക് നേരെയുള്ള പീഡനം “ഒറ്റത്തവണയുള്ള വംശീയ ഉന്മൂലനമല്ല, മറിച്ച് ആവർത്തിച്ചുള്ള പ്രക്രിയയാണെന്ന്” സാമ്പത്തിക വിദഗ്ധനും എഴുത്തുകാരനും ഇന്ത്യൻ സർക്കാരിന്റെ പ്രധാന സാമ്പത്തിക ഉപദേഷ്ടാവുമായ സഞ്ജീവ് സന്യാൽ നിരീക്ഷിച്ചു .1947 ലെ വിഭജനത്തെക്കുറിച്ചും സ്വാതന്ത്ര്യ സമരത്തിൽ ബംഗാളി ഹിന്ദുക്കൾ വഹിച്ച നിർണായക പങ്കിനെക്കുറിച്ചും സന്യാൽ സൂചിപ്പിച്ചു. ഡൽഹി ഫോറിൻ കറസ്‌പോണ്ടന്റ്‌സ് ക്ലബ്ബിലാണ് ചടങ്ങു നടന്നത്.

പത്രപ്രവർത്തകൻ ദീപ് ഹൽദാറും അക്കാദമിക് വിദഗ്ധൻ അവിഷേക് ബിശ്വാസും ചേർന്നെഴുതിയ “ബീയിംഗ് ഹിന്ദു ഇൻ ബംഗ്ലാദേശ്: ആൻ അൺടോൾഡ് സ്റ്റോറി” എന്ന പുസ്തകം പ്രസിദ്ധീകരിച്ചത് ഹാർപ്പർകോളിൻസ് ആണ്.

1947-ൽ ഇന്ത്യ വിഭജിക്കപ്പെട്ടതിന് ശേഷം 1971-ൽ ബംഗ്ലാദേശായി മാറിയ കിഴക്കൻ പാകിസ്ഥാനിലെ ഹിന്ദു ന്യൂനപക്ഷത്തിന്റെ ജീവിതവും ശബ്ദവും ഹൽദറിന്റെയും ബിശ്വാസിന്റെയും പുസ്തകം പരിശോധിക്കുന്നു. 2015ൽ ബംഗ്ലാദേശിൽ 17 ദശലക്ഷം ഹിന്ദുക്കൾ താമസിച്ചിരുന്നതായി ബംഗ്ലാദേശ് ബ്യൂറോ ഓഫ് സ്റ്റാറ്റിസ്റ്റിക്‌സിനെ ഉദ്ധരിച്ച് പുസ്തകം പറയുന്നു, എന്നാൽ ആക്രമണമോ ഭീഷണിയോ കാരണം അവർ രാജ്യം വിടുകയാണെന്ന് കൂട്ടിച്ചേർക്കുന്നു.

അടുത്ത വർഷം രാജ്യത്ത് നടക്കുന്ന തിരഞ്ഞെടുപ്പിൽ പ്രതിപക്ഷമായ ബംഗ്ലാദേശ് നാഷണലിസ്റ്റ് പാർട്ടി (ബിഎൻപി) അധികാരത്തിൽ വന്നാൽ ബംഗ്ലാദേശിലെ ഹിന്ദുക്കളുടെ അവസ്ഥ കൂടുതൽ വഷളാകുമെന്ന് പുസ്തകം പറയുന്നു .

“ബംഗ്ലാദേശിലെ ഹിന്ദുക്കൾ നമ്മൾ ഉപേക്ഷിച്ച ഇന്ത്യക്കാരാണ്” എന്ന് സന്യാൽ പറഞ്ഞു. 2022-ലെ ബംഗ്ലദേശിലെ ദേശീയ ഗവൺമെന്റ് സെൻസസ് പ്രകാരം രാജ്യത്തെ ഹിന്ദുക്കളുടെ എണ്ണം 2011-ലെ മൊത്തം ജനസംഖ്യയുടെ 10 ശതമാനത്തിൽ നിന്ന് 2022-ൽ 8 ശതമാനമായി കുറഞ്ഞു.

20 വർഷത്തിലേറെക്കാലമായി പത്രപ്രവർത്തകനായ ഹൽദാർ, ബംഗ്ലാദേശിലെ/പശ്ചിമ ബംഗാളിലെ മതം, ജാതി, രാഷ്‌ട്രീയം എന്നീ വിഷയങ്ങളിൽ അഗ്രഗണ്യനാണ്. ബ്ലഡ് ഐലൻഡ്: ആൻ ഓറൽ ഹിസ്റ്ററി ഓഫ് ദി മരിച്ജാപി കൂട്ടക്കൊല (2019), ബംഗാൾ 2021: ആൻ ഇലക്ഷൻ ഡയറി (2021) എന്നിവയുടെ രചയിതാവ് കൂടിയാണ് അദ്ദേഹം .ഈ പുസ്തകത്തിന്റെ സഹ രചയിതാവായ ബിശ്വാസ് കൽക്കട്ട സർവകലാശാലയിലെ വിദ്യാസാഗർ കോളേജിലെ ഇംഗ്ലീഷ് സാഹിത്യത്തിൽ അസിസ്റ്റന്റ് പ്രൊഫസറാണ്. ജാദവ്പൂർ സർവ്വകലാശാലയിൽ നിന്ന് പിഎച്ച്ഡി നേടിയിട്ടുള്ള അദ്ദേഹം വിഭജന ചരിത്രത്തിന്റെ വിവരണങ്ങൾ ആർക്കൈവ് ചെയ്യുന്ന പദ്ധതിയിൽ പ്രവർത്തിക്കുന്നു.