മനാമ: ബഹ്റൈനിലെ സെർട്ടിഫൈഡ് കൗൺസിലർമാരുടെ സംഘടനയായ പ്രവാസി ഗൈഡൻസ് ഫോറം എല്ലാ വർഷവും നൽകി വരുന്ന കർമ്മജ്യോതി പുരസ്കാരത്തിന് ഈ വർഷം ബഹ്റൈനിലെ സാമൂഹ്യപ്രവർത്തനരംഗത്ത് നിസ്തുലമായ സംഭാവനകൾ നൽകി വരുന്ന മനോജ് വടകരയെ തിരഞ്ഞെടുത്തു. ഡോ. ബാബു രാമചന്ദ്രൻ, ചന്ദ്രൻ തിക്കോടി, എസ്. വി. ജലീൽ, ഫ്രാൻസിസ് കൈതാരത്ത്, സലാം മമ്പാട്ടുമൂല, പി വി രാധാകൃഷ്ണ പിള്ള, സുബൈർ കണ്ണൂർ, പി ഉണ്ണികൃഷ്ണൻ എന്നിവർക്കാണ് മുൻ വർഷങ്ങളിൽ പിജിഎഫ് കർമ്മജ്യോതി പുരസ്കാരം ലഭിച്ചിട്ടുള്ളത്.
ഇതോടൊപ്പം സംഘടനയുടെ അംഗങ്ങൾക്കായി നൽകിവരാറുള്ള പുരസ്കാരങ്ങളും പ്രഖ്യാപ്പിച്ചു. പിജിഎഫ് ജ്വവൽ അവാർഡ് ഇ.കെ. സലീമിനും, പിജിഎഫ് പ്രോഡിജി അവാർഡ് ജയശ്രീ സോമനാഥ്, മുഹ്സിന മുജീബ് എന്നിവർക്കും നൽകും. ബിജു തോമസ്, ബിനു ബിജു എന്നിവരാണ് മികച്ച ഫാക്വൽറ്റി പുരസ്കാരത്തിന് അർഹരായത്. മികച്ച മെന്ററായി ഉണ്ണികൃഷ്ണനും, മികച്ച കൗൺസിലറായി ലീബ ചെന്തുരുത്തിയും തിരഞ്ഞെടുക്കപ്പെട്ടു. സംഘടന്ക്കുള്ളിലെ മികച്ച സാമൂഹ്യപ്രവർത്തകനായുള്ള അവാർഡ് ഫാസിൽ താമരശ്ശേരിക്ക് സമ്മാനിക്കും. പിജിഎഫ് നടത്തിവരുന്ന യൂത്ത് ലീഡർഷിപ്പ് പ്രോഗ്രാമിൽ മികച്ച അവതരണം നടത്തുന്ന വിദ്യാർത്ഥികൾക്കുള്ള മെഡിലുകളും പരിപാടിയിൽ വിതരണം ചെയ്യും.
ഫെബ്രുവരി രണ്ടിന് സഗയയിലെ കേരള കാത്തലിക് അസോസിയേഷൻ ഹാളിൽ വെച്ച് നടക്കുന്ന പ്രവാസി ഗൈഡൻസ് ഫോറത്തിന്റെ പതിനഞ്ചാം വാർഷികയോഗത്തിൽ ഈ പുരസ്കാരങ്ങൾ സമ്മാനിക്കുമെന്ന് പ്രവാസി ഗൈഡൻസ് ഫോറം ഭാരവാഹികൾ അറിയിച്ചു. പ്രശസ്ത കൗൺസിലിങ്ങ് വിദഗ്ധൻ ഡോ. ജോൺ പനക്കൽ ചെയർമാനും, മാദ്ധ്യമപ്രവർത്തകൻ പ്രദീപ് പുറവങ്കര വർക്കിങ്ങ് ചെയർമാനായുമുള്ള അഡൈ്വസി ബോർഡിന്റെ കീഴിൽ ലത്തീഫ് കോലിക്കൽ പ്രസിഡന്റും, വിമല തോമസ് ജനറൽ സെക്രട്ടറിയുമായുള്ള 25 അംഗം നിർവാഹക സമിതിയാണ് നോർക്ക അംഗീകൃതമായ പ്രവാസി ഗൈഡൻസ് ഫോറത്തിനെ നയിക്കുന്നത്. കൗൺസിലിംഗ് രംഗത്ത് നടത്തി വരുന്ന പ്രവർത്തനങ്ങൾക്കൊപ്പം വിവിധ ജീവകാരുണ്യ പ്രവർത്തനങ്ങളും, വിദ്യാഭ്യാസ പ്രവർത്തനങ്ങളും പിജിഎഫ് നടത്തിവരുന്നുണ്ട്. കൗൺസിലിങ്ങിൽ ഡിപ്ലോമ നേടിയ നൂറ്റിയമ്പതോളം സജീവ അംഗങ്ങളാണ് സംഘടനയിൽ പ്രവർത്തിക്കുന്നത്.