ന്യൂഡൽഹി: മദ്ധ്യപ്രദേശ് മുൻ മുഖ്യമന്ത്രി ശിവരാജ് സിംഗ് ചൗഹാൻ ഉൾപ്പെടെയുള്ള മുതിർന്ന നേതാക്കൾക്ക് പാർട്ടി കൂടുതൽ ഉത്തരവാദിത്തങ്ങൾ നൽകുമെന്ന് ബിജെപി ദേശീയ അദ്ധ്യക്ഷൻ ജെ.പി നദ്ദ. മദ്ധ്യപ്രദേശിൽ ശിവരാജ് സിംഗ് ചൗഹാന് പകരം ഡോ.മോഹൻ യാദവിന് മുഖ്യമന്ത്രി സ്ഥാനം നൽകിയതുമായി ബന്ധപ്പെട്ട് ഉയർന്ന ചോദ്യത്തിന് മറുപടി നൽകുകയായിരുന്നു അദ്ദേഹം.
”ശിവരാജ് സിംഗ് ചൗഹാൻ, വസുന്ധര രാജെ, രമൺ സിംഗ് ഇവരെല്ലാം പാർട്ടിക്ക് നിരവധി സംഭാവനകൾ നൽകിയ നേതാക്കളാണ്. അവരുടെ സ്ഥാനത്തിന് അനുയോജ്യമായ പദവികൾ ഭാവിയിൽ നൽകും. ബിജെപിയിലുള്ള ഓരോ പാർട്ടി പ്രവർത്തകനും കൃത്യമായ അവകാശങ്ങളുണ്ട്. അവരെ ഉപയോഗപ്പെടുത്തുക എന്നതാണ് പാർട്ടി ചെയ്യുന്നത്. എല്ലാവരേയും ഉൾക്കൊള്ളുന്ന സമീപനത്തിനാണ് ബിജെപി ഊന്നൽ നൽകുന്നതെന്നും” അദ്ദേഹം പറഞ്ഞു.
മുൻ മുഖ്യമന്ത്രിമാരിൽ അതൃപ്തിയുണ്ടെന്ന തരത്തിലുള്ള കുപ്രചരണങ്ങളേയും അദ്ദേഹം തള്ളിക്കളഞ്ഞു. ഓരോ പ്രവർത്തകനും അവരുടെ പ്രവർത്തനങ്ങൾക്ക് അനുസരിച്ച് പാർട്ടിയിൽ സ്ഥാനം ലഭിക്കുമെന്നും, പ്രവർത്തകരോടുള്ള പ്രതിബദ്ധതയേയാണ് ഇത് തെളിയിക്കുന്നതെന്നും അദ്ദേഹം ചൂണ്ടിക്കാണിച്ചു.
