പാമ്പുകളുടെ കൂട്ടത്തിൽ തന്നെ ഏറ്റവും അപകടകാരിയും വിഷമുള്ളതുമായ പാമ്പാണ് അണലി. ചില പ്രദേശങ്ങളിൽ ഇവ വട്ടക്കൂറ, ചേനതണ്ടൻ, തേക്കില പുള്ളി എന്നീ പേരുകളിൽ അറിയപ്പെടുന്നു. മണ്ണിന്റെ നിറത്തോട് സാമ്യമുള്ള ഇവയെ പെട്ടന്നൊന്നും കണ്ണിൽ പെടില്ല. അതിനാൽ തന്നെ ഇവയുടെ കടിയേൽക്കാനുള്ള സാധ്യതയും ഏറെ കൂടുതലാണ്. ഏത് ദിശയിലേക്ക് വേണമങ്കിലും അനായാസം തിരിഞ്ഞ് കൊത്താൻ കഴിയുന്ന പാമ്പാണ് അണലി. അവയുടെ ശരീരം തടിച്ചതും ശരീരത്തിന്മേൽ തവിട്ട് നിറത്തിൽ കറുത്ത കളറിൽ ചങ്ങലക്കണ്ണികൾ പോലെയുള്ള പുള്ളികളും കാണാം. ഇതു കാണുമ്പോൾ മലമ്പാമ്പിനോട് സാദൃശ്യം തോന്നി പലരും ഇവയെ പിടിക്കാൻ ശ്രമിച്ച് പണി വാങ്ങിയിട്ടുമുണ്ട്. ഉഗ്രവിഷമാണ് ഇവയ്ക്കുള്ളത്.
ഡിസംബർ, ജനുവരി മാസങ്ങളിലാണ് ഈ പാമ്പുകളെ കൂടുതലായി കാണാൻ സാധിക്കുന്നത്. അതിനാൽ രാത്രികാലങ്ങളിൽ പുറത്തിറങ്ങി നടക്കുമ്പോൾ പ്രത്യേകം ശ്രദ്ധിക്കേണ്ടതാണ്. എലികളുടെ മാളകളിലും ചൂട് കിട്ടുന്നതിനായി വിറകുപുര പോലുള്ളയിടങ്ങളിലും ഇവയെ പ്രധാനമായും കണ്ടുവരുന്നു. എലികളാണ് ഇവയുടെ പ്രധാന ഭക്ഷണം. ഇവയുടെ കടിയേൽക്കുകയാണെങ്കിൽ സ്വയം ചികിത്സയ്ക്ക് നിൽക്കാതെ ഉടൻ തന്നെ വൈദ്യസഹായം തേടാൻ നോക്കുക. അണലിയുടെ കടിയേറ്റാൽ കഠിനമായ വേദനയും, മൂത്രതടസ്സം അനുഭവപ്പെടുകയും ചെയ്യുന്നു. ഇവയുടെ വിഷം വളരെപ്പെട്ടന്ന് നാഡികളെ ബാധിക്കുന്നതാണ്. അതിനാൽ കടിയേൽക്കുന്ന വ്യക്തികളെ ആന്റി-വെനമുള്ള ആശുപത്രിയിൽ തന്നെ പ്രവേശിപ്പിക്കാൻ പ്രത്യേകം ശ്രദ്ധിക്കുക.