ഐപിഎല്ലിന്റെ 16 വർഷത്തെ ചരിത്രത്തിൽ ലേലം നിയന്ത്രിക്കാൻ ഒരു വനിത എത്തുന്നതായി റിപ്പോർട്ട്. വനിത ഐപിഎല്ലിന്റേയും പ്രോ കബഡി ലീഗിന്റേയുമൊക്കെ ലേലം നിയന്ത്രിച്ച പ്രമുഖയായ മല്ലിക സാഗറാണ് ദുബായിൽ നടക്കുന്ന മിനി താര ലേലത്തിൽ ഓക്ഷണറായി എത്തുകയെന്നാണ് റിപ്പോർട്ട്. നാളെ ഉച്ചയ്‌ക്ക് ഒരു മണിമുതൽ ദുബായിലാണ് താര ലേലം നടക്കുന്നത്.
ഐപിഎൽ ചരിത്രത്തിലെ നാലാമത്തെ മാത്രം ഓക്ഷണറായിരിക്കും മല്ലിക. റിച്ചാർഡ് മാഡ്ലിയായിരുന്നു ആദ്യമായി താര ലേലം നിയന്ത്രിച്ചതും വലിയ കൈമാറ്റങ്ങൾക്ക് സാക്ഷിയായതും. 2018 ൽ ഹ്യൂഗ് എഡ്മീഡ്സ് ഓക്ഷണറായപ്പോൾ. 2022ൽ ആദ്യ ഇന്ത്യൻ ഓക്ഷണറായത് ചാരു ശർമ്മയായിരുന്നു.
48-കാരിയായ മല്ലിക 2023ൽ വനിത പ്രീമിയർ ലീഗിന്റെ ഓക്ഷണറായിരുന്നു. പ്രോ കബഡി ലീഗിൽ വർഷങ്ങളുടെ പരിചയമുള്ള മല്ലിക ഈ മേഖലയിലെത്തിയിട്ട് 25 വർഷമായി. മല്ലിക മുംബൈയിലെ ഒരു പ്രശസ്ത ആർട് കളക്ടറാണ്. ആർട് ഗ്യാലറികളിലെ ലേലങ്ങളിലൂടെയാണ് ഇവർ ഈ മേഖലയിൽ ശോഭിക്കുന്നത്.
