മലയാളത്തിന്റെ പ്രിയതാരം ജയസൂര്യയെ നായകനാക്കി നവാഗതനായ അഭിജിത്ത് ജോസഫ് സംവിധാനം ചെയ്ത ചിത്രമായിരുന്നു ജോൺ ലൂഥർ. കഴിഞ്ഞവർഷം തീയേറ്ററുകളിലെത്തിയ ചിത്രം മികച്ച പ്രേക്ഷക പ്രതികരണം നേടിയിരുന്നു. സസ്പെൻസ് ത്രില്ലർ ജോണറിൽ എത്തിയ ജോൺ ലൂഥറിൽ പോലീസ് വേഷത്തിലായിരുന്നു ജയസൂര്യ എത്തിയത്. ഇപ്പോഴിതാ ചിത്രത്തെയും ജയസൂര്യയുടെ അഭിനയത്തെയും പ്രശംസിച്ച് രംഗത്തെത്തിയിരിക്കുകയാണ് ക്രിക്കറ്റ് താരം ആർ.അശ്വിൻ.
ട്വന്റി ട്വന്റി മത്സരങ്ങളിൽ പങ്കെടുക്കുന്നതിന് വേണ്ടി ജൊഹനാസ്ബെർഗിലേയ്ക്ക് യാത്ര ചെയ്യുന്നതിനിടെയാണ് അദ്ദേഹം ജോൺ ലൂഥർ കണ്ടത്. തന്റെ യൂട്യൂബ് ചാനലിൽ പങ്കുവെച്ച വീഡിയോയിലൂടെയാണ് അശ്വിൻ അഭിനന്ദനം പങ്കുവെച്ചത്. ‘എന്നാ നടിപ്പ്’ എന്നായിരുന്നു ജയസൂര്യയുടെ പ്രകടനത്തെ പറ്റി അശ്വിൻ പറഞ്ഞത്. ഈ അടുത്ത് താൻ കണ്ട ഏറ്റവും മികച്ച ചിത്രങ്ങളിലൊന്നായിരുന്നു ജോൺ ലൂഥർ എന്നും അശ്വിൻ കൂട്ടിച്ചേർത്തു. അശ്വിന്റെ വാക്കുകൾ ഇങ്ങനെ…
‘യാത്രക്കിടെ വിജയ് ആന്റണി നായകനായ ‘കൊലൈ’ എന്ന ചിത്രമാണ് ഞാൻ ആദ്യം കണ്ടത്. അതൊരു കുറ്റാന്വേഷണ കഥയായിരുന്നു. പക്ഷേ അതിന് ശേഷം ഞാൻ ‘ജോൺ ലൂഥർ’ എന്നൊരു സിനിമ കണ്ടു. എന്റെ ഊഹം ശരിയാണെങ്കിൽ വസൂൽരാജ എംബിബിഎസിൽ സാക്കിർ എന്ന കഥാപാത്രമായി എത്തിയ നടനാണ് ചിത്രത്തിലെ നായകൻ. എന്തൊരു അഭിനയം…
വളരെ സത്യസന്ധനായ ഒരു പോലീസ് ഉദ്യോഗസ്ഥന്റെ കഥായാണ് ചിത്രം പറയുന്നത്. വിമാനയാത്രയ്ക്കിടെ മറ്റ് പലജോലികളും ചെയ്ത് തീർക്കാം എന്നായിരുന്നു ആദ്യം കരുതിയിരുന്നത്. അതിന് വേണ്ടി എന്റെ ഡയറിയുമെടുത്തിരുന്നു. പണികൾക്കിടയിലായിരുന്നു ജോൺ ലൂഥർ സിനിമ കണ്ടുതുടങ്ങിയത്. എന്നാൽ പിന്നീട് ഫോണിലേയ്ക്കും ഡയറിയിലേയ്ക്കും നോക്കാനെ തോന്നിയില്ല. രണ്ടരമണിക്കൂർ ഒറ്റയിരുപ്പിൽ ഇരുന്ന് സിനിമ കണ്ട് തീർക്കുകായിരുന്നു. അശ്വിൻ പറഞ്ഞു.
തൊട്ടുപിന്നാലെ അശ്വിന്റെ വാക്കുകൾക്ക് നന്ദി അറിയിച്ച് നടൻ ജയസൂര്യയും രംഗത്തെത്തി. ജോൺ ലൂഥറിന് ലഭിച്ച ഈ അഭിനന്ദനം വളരെ സന്തോഷം നൽകുന്നതാണ് എന്നായിരുന്നു അശ്വിന്റെ വീഡിയോ പങ്കുവെച്ച് ജയസൂര്യ കുറിച്ചത്.