മനാമ: കുട്ടികൾക്കായി എല്ലാ വർഷവും കെസിഎ നടത്തിവരുന്ന കൗമാര കലകളുടെ വസന്തോത്സവമായ കലാ-സാഹിത്യ, സംസ്‌കാരിക ഉത്സവം ”ബിഎഫ്സി – കെസിഎ ദി ഇന്ത്യൻ ടാലന്റ് സ്‌കാൻ 2023” ഗ്രാൻഡ് ഫിനാലെ ഡിസംബർ 29ന് നടക്കും. 800ൽ അധികം കുട്ടികളാണ് ഒരു മാസം നീണ്ടുനിന്ന മത്സരങ്ങളിൽ പങ്കെടുത്തത്. പ്രായത്തിന്റെ അടിസ്ഥാനത്തിൽ അഞ്ച് ഗ്രൂപ്പുകളായി തിരിച്ചാണ് മത്സരം നടത്തിയത്. എല്ലാ വിഭാഗത്തിലും 150ൽ അധികം മത്സരങ്ങളാണ് ഉണ്ടായിരുന്നത്.
ഗ്രാൻഡ് ഫിനാലെ 29ന് വൈകുന്നേരം 5.30 ന് നടക്കും. ഫിനാലെ വേദിയിൽ അവാർഡുകൾ, ട്രോഫികൾ, സർട്ടിഫിക്കറ്റുകൾ എന്നിവയും വിതരണവും ചെയ്യും. നടി അഞ്ചു മേരി തോമസാണ് അവാർഡുദാനം നിർവഹിക്കുക.പങ്കെടുത്ത എല്ലാ കുട്ടികൾക്കും പ്രോത്സാഹന സമ്മാനമായി സർട്ടിഫിക്കറ്റുകൾ നൽകും.
82 പോയിന്റ് നേടിയ ഇന്ത്യൻ സ്‌കൂളിലെ ഇഷ ആഷിക്കിനാണ് കലാതിലകം പട്ടം. 63 പോയിന്റുമായി ന്യൂ ഇന്ത്യൻ സ്‌കൂളിലെ ജൊഹാൻ സിബു ജോർജ് കലാപ്രതിഭ പട്ടത്തിന് അർഹനായി. ഗ്രൂപ്പ് 1 ചാമ്പ്യൻഷിപ്പ് അവാർഡ് 65 പോയിന്റുമായി ഏഷ്യൻ സ്‌കൂളിലെ അക്ഷിത വൈശാഖ് നേടിയപ്പോൾ, ഗ്രൂപ്പ് 2 ചാമ്പ്യൻഷിപ്പ് അവാർഡ് 72 പോയിന്റുമായി ന്യൂ ഇന്ത്യൻ സ്‌കൂളിൽ നിന്നുള്ള ആരാധ്യ ജിജേഷ് കരസ്ഥമാക്കി. ഗ്രൂപ്പ് 4 ചാമ്പ്യൻഷിപ്പ് അവാർഡ് 52 പോയിന്റുമായി ഇന്ത്യൻ സ്‌കൂളിലെ നക്ഷത്ര രാജ് സി. കരസ്ഥമാക്കി. ഇന്ത്യൻ സ്‌കൂളിലെ ഇഷിക പ്രദീപാണ് 65 പോയിന്റ് നേടി ഗ്രൂപ്പ് 5 ചാമ്പ്യൻഷിപ്പിന് അർഹയായത്.
കെസിഎ അംഗങ്ങളായ കുട്ടികൾക്കുള്ള പ്രത്യേക കെസിഎ ഗ്രൂപ്പ് ചാമ്പ്യൻഷിപ്പ് അവാർഡ് ജോയൻ സിജോ (ഗ്രൂപ്പ്-2), ശ്രേയ സൂസൻ സക്കറിയ (ഗ്രൂപ്പ്-4), സർഗ സുധാകരൻ (ഗ്രൂപ്പ് 5) എന്നിവർ കരസ്ഥമാക്കി. നാട്യരത്ന അവാർഡിന് നൃത്ത മത്സരങ്ങളിൽ മികവ് തെളിയിച്ച ഇന്ത്യൻ സ്‌കൂളിലെ ഇഷിക പ്രദീപ് അർഹയായി.
ഇന്ത്യൻ സ്‌കൂളിലെ ശ്രേയ സൂസൻ സക്കറിയ ഗാനാലാപന വിഭാഗത്തിൽ നിന്ന് സംഗീത രത്ന അവാർഡ് നേടി.സാഹിത്യ മത്സരങ്ങളിൽ പ്രാവീണ്യം തെളിയിക്കുന്ന സാഹിത്യ രത്ന അവാർഡ് ഏഷ്യൻ സ്‌കൂളിലെ ഷൗര്യ ശ്രീജിത് കരസ്ഥമാക്കി.ആർട്‌സ് ആൻഡ് ക്രാഫ്റ്റ്‌സ് വിഭാഗത്തിൽ നിന്ന് 33 പോയിന്റുമായി ന്യൂ ഇന്ത്യൻ സ്‌കൂളിലെ ദിയ അന്ന സനു കലാരത്ന അവാർഡിന് അർഹയായി.മികച്ച നൃത്ത അധ്യാപക അവാർഡും മികച്ച സംഗീത അധ്യാപക അവാർഡും ഗ്രാൻഡ് ഫിനാലെയിൽ പ്രഖ്യാപിക്കും.
