കൊൽക്കത്ത: ഇന്ത്യൻ സൂപ്പർ ലീഗിൽ (ഐ.എസ്.എൽ) മോഹൻ ബഗാൻ സൂപ്പർ ജയന്റ്സിനെതിരായ മത്സരത്തിൽ കേരളാ ബ്ലാസ്റ്റേഴ്സിന് ജയം. മറുപടിയില്ലാത്ത ഒരു ഗോളിനായിരുന്നു കൊമ്പന്മാരുടെ ജയം. ഡിമിത്രിയോസ് ഡയമന്റകോസാണ് ബ്ലാസ്റ്റേഴ്സിനായി വലകുലക്കിയത്. ജയത്തോടെ 12 മത്സരങ്ങളിൽ നിന്ന് 26 പോയിന്റുമായി പോയിന്റ് പട്ടികയിൽ ഒന്നാമതാണ് കൊമ്പന്മാർ. പരസ്പരം ഏറ്റുമുട്ടിയ അവസാന ആറ് മത്സരങ്ങളിൽ ബ്ലാസ്റ്റേഴ്സിന് ഒരു ജയം പോലുമില്ല എന്ന നാണക്കേടും ഇന്നത്തെ മത്സരത്തോടെ തീർന്നു.
മത്സരത്തിന്റെ ഒമ്പതാം മിനിറ്റിൽ ഗ്രീക്ക് താരം ഡിമിത്രിയോസ് ഡയമന്റകോസാണ് ബ്ലാസ്റ്റേഴ്സിനായി ഗോൾ നേടിയത്. സാൾട്ട് ലേക്ക് സ്റ്റേഡിയത്തിൽ ബ്ലാസ്റ്റേഴ്സിന്റെ മുന്നേറ്റത്തോടെയാണ് മത്സരം തുടങ്ങിയത്. മോഹൻ ബഗാന്റെ പ്രതിരോധനിരയെ മറികടന്നാണ് ഇടതുവിങ്ങിൽ നിന്ന് ഡിമി വലകുലുക്കിയത്. സീസണിൽ താരം നേടുന്ന ഏഴാം ഗോളാണിത്. ഈ ഗോളോടെ ടൂർണമെന്റിലെ ഗോൾവേട്ടക്കാരുടെ പട്ടികയിൽ ഒന്നാമതാണ് താരം.
മത്സരത്തിൽ കൊമ്പന്മാർ മോഹൻ ബഗാന് ശക്തമായ വെല്ലുവിളി ഉയർത്തി. ഡിമിത്രിയോസും ലെസ്കോവിച്ചുമായിരുന്നു ബ്ലാസ്റ്റേഴ്സ് നിരയിലെ അപടകാരികൾ. പക്ഷേ രണ്ടാം പകുതിയിൽ ഗോൾ കണ്ടെത്താൻ ബ്ലാസ്റ്റേഴ്സിനായില്ല. കൊമ്പൻമാർക്കെതിരെ സമനില പിടിക്കാൻ മറൈനേഴ്സ് ശ്രമിച്ചെങ്കിലും ബ്ലാസ്റ്റേഴ്സ് പ്രതിരോധം കുലുങ്ങിയില്ല.