ജനപ്രിയ സമൂഹമാദ്ധ്യമമായ ഫേസ്ബുക്ക് ഏറ്റവും പുതിയ ഫീച്ചർ അവതരിപ്പിച്ചു. ഫേസ്ബുക്ക് മെബൈൽ ആപ്പിൽ ലിങ്ക് ഹിസ്റ്ററി എന്ന പേരിലാണ് പുതിയ ഫീച്ചർ അവതരിപ്പിച്ചിരിക്കുന്നത്. പുതിയ ഫീച്ചർ എല്ലാ മൊബൈൽ ഫേസ്ബുക്ക് ഉപയോക്താക്കൾക്കും ലഭ്യമാവും. ആഗോളതലത്തിൽ ഉടൻ തന്നെ ഫീച്ചർ ലഭ്യമാകുമെന്ന് മെറ്റ അറിയിച്ചു.
ഉപഭോക്താക്കളുടെ ലിങ്ക് ഹിസ്റ്ററി രേഖപ്പെടുത്തുന്നത് വഴി അവരെ ലക്ഷ്യമിട്ട് കൊണ്ട് പരസ്യങ്ങൾ എത്തിക്കാൻ ഫേസ്ബുക്കിനാവും. ഒരു ഉപഭോക്താവ് എന്തൊക്കെ ഫേസ്ബുക്കിൽ ക്ലിക്ക് ചെയ്യുന്നുവോ അവയെല്ലാം ആപ്പ് ശേഖരിക്കും. ഈ ഫീച്ചർ ആക്റ്റിവേറ്റ് ആക്കാനും ഓഫാക്കാനും ഉപയോക്താവിന് കഴിയും. എന്തെല്ലാം ലിങ്കുകൾ നിങ്ങൾ ക്ലിക്ക് ചെയ്തിട്ടുണ്ടെന്ന വിവരങ്ങളാണ് ലിങ്ക് ഹിസ്റ്ററിയിൽ നിന്നും ലഭിക്കുക. 30 ദിവസത്തേക്കാണ് ഹിസ്റ്ററി സൂക്ഷിച്ച് വെക്കുക. ലിങ്ക് ഹിസ്റ്ററി ഓഫാക്കുന്നത് വഴി ശേഖരിച്ചുവച്ച ഹിസ്റ്ററിയെല്ലാം 90 ദിവസത്തിനുള്ളിൽ നീക്കം ചെയ്യും.
ലിങ്ക് ഹിസ്റ്ററി ഓഫാക്കുന്നതിന് ആദ്യം ഫേസ്ബുക്ക് മൊബൈൽ ബ്രൗസർ ലിങ്കുകൾ എന്തെങ്കിലും തുറക്കുക, തുടർന്ന് താഴെ വലത് ഭാഗത്തുള്ള മോർ ആക്ഷൻ ബട്ടൻ ക്ലിക്ക് ചെയ്യുക. ബ്രൗസർ സെറ്റിങ്‌സ് തിരഞ്ഞെടുക്കുക. അതിൽ ലിങ്ക് ഹിസ്റ്ററി ഡിസേബിൾ ചെയ്യാം.
