ഛണ്ഡീഗഡ്: പഞ്ചാബിലെ ടാൻ ടരൺ ജില്ലയിൽ നിന്നും മയക്കുമരുന്ന് അടങ്ങിയ ഡ്രോൺ കണ്ടെടുത്ത് അതിർത്തി സുരക്ഷാ സേന. ഡ്രോണിൽ നിന്നും 515 ഗ്രാമിലധികം ഹെറോയിൻ കണ്ടെടുത്തതായി സുരക്ഷാ സേന അറിയിച്ചു. ഇന്നലെ രാത്രിയായിരുന്നു സംഭവം.
പഞ്ചാബിലെ ദാൽ ഗ്രാമത്തിൽ കള്ളക്കടത്തുക്കാരുടെ നുഴഞ്ഞുക്കയറ്റവുമായി ബന്ധപ്പെട്ട വിവരങ്ങൾ അതിർത്തി സുരക്ഷാ സേനയ്ക്ക് ലഭിച്ചിരുന്നു. ഇതിന്റെ അടിസ്ഥാനത്തിൽ സുരക്ഷാ സേനയും പോലീസും സംയുക്തമായി ചേർന്ന് നടത്തിയ അന്വേഷണത്തിലാണ് വയലിൽ നിന്നും മയക്കുമരുന്നടങ്ങിയ ഡ്രോൺ ഉദ്യോഗസ്ഥർക്ക് ലഭിച്ചത്. ചൈനീസ് നിർമ്മിതിയായ DJI Mavic 3 Classic മോഡൽ ഡ്രോണാണ് കണ്ടെടുത്തതെന്ന് സുരക്ഷാ സേന അറിയിച്ചു.
കഴിഞ്ഞ 7-ാം തീയതി പഞ്ചാബിലെ ഫിറോസ്പൂർ ജില്ലയിൽ നിന്നും പാകിസ്താൻ കള്ളക്കടത്തുക്കാർ ലഹരി കടത്താൻ ഉപയോഗിച്ച ഡ്രോണും സുരക്ഷാ സേന കണ്ടെത്തിയിരുന്നു. ഇത്തരത്തിൽ കള്ളക്കടത്തുക്കാരുടെ നിരവധി ശ്രമങ്ങൾ തടഞ്ഞതായും വരും ദിവസങ്ങളിൽ പ്രദേശത്ത് പരിശോധന ശക്തമാക്കുമെന്നും അതിർത്തി സുരക്ഷാ സേന വ്യക്തമാക്കി.