ഏറെ വെല്ലുവിളികളെ അഭിമുഖീകരിച്ചാണ് പലരും സ്വന്തം ജീവിതം കെട്ടിപ്പടുത്തുന്നത്. അത്തരത്തിൽ ജീവിതം നയിക്കുന്ന വ്യക്തിയാണ് ശ്രീകൃഷ്ണന്റെ ചിത്രങ്ങൾ വരച്ച് വിൽക്കുന്ന ജെസ്ന സലീം. ഗുരുവായൂർ ക്ഷേത്രത്തിൽ ദർശനത്തിനെത്തിയ വേളയിൽ പ്രധാനമന്ത്രിക്ക് താൻ വരച്ച കൃഷ്ണന്റെ ഫോട്ടോ സമ്മാനിക്കാൻ കഴിഞ്ഞുവെന്ന സന്തോഷത്തിനിടയിലും തനിക്കും മക്കൾക്കും ഉണ്ടായ ദുരനുഭവങ്ങൾ തുറന്ന് പറയുകയാണ് ജെസ്ന സലീം.
ശ്രീകൃഷ്ണന്റെ ഫോട്ടോ വരച്ച് ഉപജീവനമാർഗം കണ്ടെത്തുന്നതിലുള്ള അമർഷം തീർത്തത് കുട്ടികൾക്ക് മദ്രസ വിദ്യാഭ്യാസം വിലക്കിയായിരുന്നുവെന്ന് ജെസ്ന പറയുന്നു. തന്റെ മകനാണെന്ന് അറിഞ്ഞ് കൊണ്ട് തന്നെ മദ്രസയിലെ അദ്ധ്യാപകനായ മുജീബ് എന്ന ഉസ്താദ് ദിവസവും കുട്ടിയെ സ്ഥിരമായി അടിക്കുമായിരുന്നു. നേരം വൈകി എത്തി, ഹോം വർക്ക് ചെയ്തില്ല തുടങ്ങിയ ചെറിയ കാര്യങ്ങൾക്കാണ് തല്ലിയിരുന്നത്. ഓരോരോ കാര്യങ്ങൾ ഉണ്ടാക്കിയാണ് കുട്ടിയെ തല്ലിയിരുന്നതെന്ന് ജെസ്ന നിറകണ്ണുകളോടെ പറഞ്ഞു.
പിഞ്ചു കുഞ്ഞിനെ ക്ലാസിൽ നിന്ന് പുറത്താക്കി അമ്മയുമായി എത്താനാകും മിക്കപ്പോഴും ഉസ്താദ് നിർദ്ദേശിക്കുന്നത്. നമ്മുടെ സമ്പദ്രായത്തിൽ ഇങ്ങനെയൊന്നും ചെയ്യരുതെന്നും ഇങ്ങനെയൊക്കെ നടക്കരുതെന്ന് അറിയില്ലേ എന്ന് ചോദിക്കാനും ഉപദേശിക്കാനുമാണ് ഉസ്താദ് തന്നെ വിളിപ്പിച്ചു കൊണ്ടിരുന്നതെന്ന് ജെസ്ന പറഞ്ഞു. ഇത് കണ്ടിട്ടാണ് മറ്റുള്ളവരും പഠിക്കുന്നതെന്നും പറഞ്ഞിരുന്നുവെന്നും സ്വർഗവും നരകവും മരണാനന്തര ജീവിതത്തെ കുറിച്ചും പറയുമെന്നും അവർ കൂട്ടിച്ചേർത്തു.
ഞാൻ അല്ല ഇവിടെ പഠിക്കാൻ വരുന്നത് എന്റെ മകനാണ്, അവന്റെ കാര്യം നിങ്ങൾ നോക്കിയാൽ പോരെ എന്ന് പറഞ്ഞെങ്കിലും ഉസ്താദിന്റെ ഉപദ്രവം കൂടി വന്നു. കുട്ടിക്ക് മദ്രസ എന്ന് കേൾക്കുന്നതും രാവിലെ ഉണരാനും പോകാനുമൊക്കെ പേടിയായി തുടങ്ങി. ഒടുവിൽ മദ്രസ പഠനം നിർത്തുകയായിരുന്നു. താൻ കാരണം കുട്ടിയുടെ പഠനം മുടങ്ങുകയാണല്ലോ എന്നോർത്ത് വീണ്ടും ചോദിക്കാൻ ചെന്നപ്പോൾ പള്ളി കമ്മിറ്റിയിൽ ചോദിക്കണം എന്നായിരുന്നു മറുപടി. ഏതെങ്കിലുമൊരു രക്ഷിതാവിന് ബുദ്ധിമുട്ടുണ്ടെങ്കിൽ കുട്ടിയെ പഠിപ്പിക്കാൻ സാധിക്കില്ലെന്നും ഉസ്താദ് പറഞ്ഞു. തുടർന്ന് മദ്രസ പഠനം ഉപേക്ഷിക്കാൻ നിർബന്ധിതയായി എന്നും ജെസ്ന സലീം തുറന്നുപറഞ്ഞു.
കഴിഞ്ഞ പത്ത് വർഷമായി ശ്രീകൃഷണ ഭഗവാന്റെ ചിത്രങ്ങൾ വരച്ച് വിൽക്കുകയാണ് ജെസ്ന. വിശേഷ ദിവസങ്ങളിൽ ഗുരുവായൂരിലെത്തി താൻ വരച്ച ചിത്രങ്ങൾ കണ്ണന് സമർപ്പിക്കും. പ്രധാനമന്ത്രിക്ക് ഒരു ചിത്രം സമർപ്പിക്കണമെന്ന ഏറെ നാളത്തെ ആഗ്രഹം സഫലമാക്കിയത് സുരേഷ് ഗോപിയാണെന്നും അവർ പറഞ്ഞിരുന്നു. സ്വന്തം മകളുടെ വിവാഹം പോലും നോക്കാതെ തന്റെ ആഗ്രഹം സഫലമാക്കിയതിന്റെ സന്തോഷത്തിലാണ് ജെസ്ന.
