തെന്നിന്ത്യൻ പ്രേക്ഷകർ ഏറെ ആവേശത്തോടെ സ്വീകരിച്ച ചിത്രമാണ് സലാർ. കെജിഎഫിന് ശേഷം പ്രശാന്ത് നീലിന്റെ സംവിധാനത്തിൽ എത്തിയ ചിത്രം കൂടിയായിരുന്നു സലാർ. തെലുങ്ക് സൂപ്പർതാരം പ്രഭാസും മലയാളികളുടെ പ്രിയതാരം പൃഥ്വിരാജും ആദ്യമായി ഒന്നിച്ച ചിത്രം കൂടിയായിരുന്നു സലാർ. ക്രിസ്മസ് റിലീസായി എത്തിയ ചിത്രം വളരെ ആവേശത്തോടെയായിരുന്നു ആരാധകരേറ്റെടുത്തതും. ഇപ്പോഴിതാ തീയേറ്ററുകൾ പൂരപ്പറമ്പാക്കിമാറ്റിയ സലാർ ഒടിടിയിലെത്തുന്നു എന്ന വാർത്തയാണ് പുറത്തുവരുന്നത്.
ചിത്രം റിലീസ് ചെയ്ത് 30-ാം ദിവസമാണ് ഒടിടിയിൽ എത്തുന്നത്. ഇന്ന് അർദ്ധരാത്രി 12 മണിക്ക് സലാർ ഒടിടിയിൽ സ്ട്രീമിംഗ് ആരംഭിക്കും. പ്രമുഖ ഒടിടി പ്ലാറ്റ്ഫോമായ നെറ്റ്ഫ്ളിക്സിലാണ് ചിത്രം റിലീസ് ചെയ്യുക. സലാറിന്റെ തെന്നിന്ത്യൻ ഭാഷാ പതിപ്പുകളാണ് ഇന്ന് ഒടിടിയിലെത്തുക. ചിത്രത്തിന്റെ ഒടിടി റിലീസ് സംബന്ധിച്ച് യാതൊരു തരത്തിലുള്ള മുന്നറിയിപ്പുകളും അണിയറ പ്രവർത്തകർ നൽകിയിരുന്നില്ല. കഴിഞ്ഞ ദിവസം ചിത്രം 600 കോടി ക്ലബ്ബിൽ കയറിയിരുന്നു. അണിയറ പ്രവർത്തകർ തന്നെയാണ് ഇക്കാര്യം പ്രേക്ഷകരുമായി പങ്കുവച്ചത്.
രണ്ട് സുഹൃത്തുക്കളുടെ കഥയാണ് സലാർ പറയുന്നത്. ഇരുവരും എങ്ങനെ ശത്രുക്കളായി മാറുന്നു എന്ന കഥയാണ് സലാർ പാർട്ട് 1സീസ് ഫയറിൽ പറയുന്നത്. ശ്രുതി ഹാസൻ നായികയാകുന്ന ചിത്രത്തിൽ ജഗപതി ബാബു, ബോബി സിംഹ, ടിന്നു ആനന്ദ്, ഈശ്വരി റാവു, ശ്രീയ റെഡ്ഡി, രാമചന്ദ്ര രാജു എന്നിവരും പ്രധാന വേഷങ്ങളിലെത്തുന്നുണ്ട്. ചിത്രത്തിന്റെ രണ്ടാം ഭാഗത്തിനായും ആരാധകർ വളരെ ആവേശത്തോടെ കാത്തിരിക്കുകയാണ്.