ആരോഗ്യം നിറഞ്ഞ ശരീരത്തിന് ഏറ്റവും അടിസ്ഥാനമായ ഘടകങ്ങളിൽ ഒന്നാണ് ശരിയായ ഉറക്കം. ദിവസവും എട്ട് മണിക്കൂർ ഉറക്കമാണ് ആരോഗ്യപരമായ ഉറക്കത്തിന്റെ കണക്കായി സാധാരണ നിലയിൽ കണക്കാക്കുന്നത്. എന്നാൽ ഓരോ വ്യക്തിയുടെയും പ്രായത്തിനനുസരിച്ച് ഉറക്കവുമായി ബന്ധപ്പെട്ട കാര്യത്തിൽ വ്യത്യാസമുണ്ടാകും. ഓരോ പ്രായത്തിലും ഉറങ്ങേണ്ട സമയത്തിൽ കൃത്യമായ വ്യത്യാസമുണ്ട്.
നവജാത ശിശുക്കൾ ഒഴികെ എല്ലാ പ്രായക്കാരിലും ഇത്തരത്തിൽ ഉറക്കത്തിന് കണക്കുണ്ട്. രോഗങ്ങളും ഗർഭാവസ്ഥയും വ്യക്തിഗത ശീലങ്ങളുമെല്ലാം കണക്കിലാക്കി ഇവയിൽ വ്യത്യാസമുണ്ട്. എന്നാൽ ഓരോ പ്രായക്കാരിലും പൊതുവെ പറയുന്ന ഉറക്കത്തിന്റെ കണക്കുകൾ എങ്ങനെയെന്ന് നോക്കാം…
0-3 മാസം
14-17 മണിക്കൂർ വരെ ഉറക്കമാണ് നവജാതശിശുക്കൾ മുതൽ മൂന്ന് മാസം വരെ പ്രായമുള്ള കുഞ്ഞുങ്ങൾക്ക് ഉണ്ടാകേണ്ടത്. ഇവരുടെ ഉറക്കം 11 മണിക്കൂറിൽ കുറയാൻ പാടില്ലെന്നും പഠനങ്ങളിൽ പറയുന്നു.
4-12 മാസം
12 മുതൽ 16 മണിക്കൂർ വരെ ഉറക്കമാണ് ഒരു വയസ് വരെ പ്രായമുള്ള കുഞ്ഞുങ്ങൾക്ക് ലഭിക്കേണ്ടത്. ഇതിൽ കുറയുന്നത് ആരോഗ്യ പ്രശ്‌നങ്ങൾക്ക് വഴിവച്ചേക്കാം.
1-2 വയസ്
11 മുതൽ 14 മണിക്കൂർ ഒരു ദിവസം ഉറങ്ങണം. 16 മണിക്കൂറാണ് ഈ പ്രായക്കാരിൽ അമിത ഉറക്കമായി കണക്കാക്കുന്നത്.
3-5 വയസ്
10-13 മണിക്കൂർ വരെയാണ് ഈ പ്രായത്തിലുള്ളവർ ഉറങ്ങേണ്ടത്. ചെറിയ മയക്കങ്ങളും ഇവയിൽ ഉൾപ്പെടുത്താം.
6-13 വയസ്
വിദ്യാർത്ഥികളായതിനാൽ 9-12 മണിക്കൂർ വരെ ഈ പ്രായത്തിലുള്ളവർക്ക് ആവശ്യമാണ്. ഉറക്കം ഒരിക്കലും ഏഴ് മണിക്കൂറിൽ കുറയാനോ 12 മണിക്കൂറിൽ കൂടാനോ പാടില്ല.
14-17 വയസ്
എട്ട് മുതൽ 10 വയസ് വരെ പ്രായമുള്ളവരാണ് ഈ പ്രായത്തിൽ ഉൾപ്പെടുന്നത്. ഈ പ്രായത്തിലുള്ളവരുടെ ഉറക്കം ഏഴ് മണിക്കൂറിൽ കുറയാൻ പാടില്ല. 11 മണിക്കൂറിൽ കൂടുതൽ ഇവർ ഉറങ്ങാനും പാടില്ല.
18-64 വയസ്
ഏഴ് മുതൽ ഒമ്പത് മണിക്കൂർ വരെ ഉറക്കം ഈ പ്രായത്തിലുള്ളവർ നിർബന്ധമായും പാലിക്കണം. ആറ് മണിക്കൂറിൽ കുറവ് ഉറക്കം ആരോഗ്യ പ്രശ്‌നങ്ങൾക്ക് വഴി വച്ചേക്കാം. എന്നാൽ 10-11 മണിക്കൂറിന് മുകളിലുള്ള ഉറക്കം ശരീരത്തിന് ദോഷമാണ്.
