തിരുവനന്തപുരം: നാഗർകോവിലിനടുത്തുള്ള മാർത്താണ്ഡം മേൽപ്പാലത്തിൽ കെഎസ്ആർടിസി ബസും തമിഴ്നാട് ട്രാൻസ്‌പോർട്ട് ബസും കൂട്ടിയിടിച്ച് അപകടം. സംഭവത്തിൽ യാത്രക്കാരുൾപ്പെടെ 35-ഓളം പേർക്ക് പരിക്കേറ്റു. നാഗർകോവിലിൽ നിന്നും തിരുവനന്തപുരം ഭാഗത്തേക്ക് പോകുകയായിരുന്ന കെഎസ്ആർടിസി ബസും കളിയിക്കാവിളയിൽ നിന്നും കന്യാകുമാരിയിലേക്ക് വരികയായിരുന്ന തമിഴ്നാട് ട്രാൻസ്‌പോർട്ട് ബസും കൂട്ടിയിടിച്ചാണ് അപകടം നടന്നത്.
നാഗർകോവിലിൽ നിന്നും തിരുവനന്തപുരത്തേക്ക് വരികയായിരുന്ന കെഎസ്ആർടിസി ബസ് മുന്നിലുള്ള ടോറസ് ലോറിയെ മറികടക്കാൻ ശ്രമിക്കവെ എതിർദിശയിൽ എത്തിയ തമിഴ്നാട് ബസുമായി കൂട്ടിയിടിക്കുകയായിരുന്നു. രണ്ട് ബസുകളിലായി 35 പേർക്കാണ് പരിക്കേറ്റത്.ഇവരെ വിവിധ ആശുപത്രികളിൽ പ്രവേശിപ്പിച്ചിരിക്കുകയാണ്.
അപകടത്തിൽ രണ്ട് വാഹനങ്ങളിലെയും ഡ്രൈവർമാർക്ക് ഗുരുതരമായി പരിക്കേറ്റിട്ടുണ്ട്. തമിഴ്നാട് ബസിന്റെ മുൻവശം പൂർണമായും തകർന്നിട്ടുണ്ട്. കെഎസ്ആർടിസിയുടെ മുൻവശം ചെറിയ രീതിയിൽ തകർന്നിട്ടുണ്ട്. യാത്രക്കാരിൽ ചിലരെ ബസിൽ നിന്നും പുറത്തേക്ക് എടുത്ത് കൊണ്ട് പോകുന്നതിന്റെ ദൃശ്യങ്ങളും പുറത്തുവന്നിട്ടുണ്ട്.
