പനാജി: അയോദ്ധ്യ രാമക്ഷേത്രത്തിലെ പ്രാണപ്രതിഷ്ഠ വിജയകരമാക്കിയ പ്രധാനമന്ത്രി നരേന്ദ്രമോദിയെ അഭിനന്ദിച്ചുകൊണ്ടുള്ള പ്രമേയം പുറത്തിറക്കി ഗോവ നിയമസഭ. നിയമസഭയുടെ ബജറ്റ് സമ്മേളനത്തിൽ സ്പീക്കർ രമേഷ് തവാദ്കറാണ് അഭിനന്ദന പ്രമേയം അവതരിപ്പിച്ചത്. അയോദ്ധ്യയിലെ ശ്രീരാമക്ഷേത്രത്തിൽ രാംലല്ലയുടെ വിഗ്രഹം സ്ഥാപിച്ച പ്രധാനമന്ത്രിയെ ഈ സഭ അഭിനന്ദിക്കുന്നു എന്നായിരുന്നു പ്രമേയം. അയോദ്ധ്യയിൽ രാംലല്ലയുടെ വിഗ്രഹം സ്ഥാപിച്ചതോടെ ഒരു സുവർണ്ണ യുഗത്തിന് തുടക്കമായി. പ്രമേയം സഭ ഐകകണ്ഠ്യേന പാസാക്കുകയും ചെയ്തു.
ഇതോടൊപ്പം ഭാരതരത്ന പുരസ്കാര ജേതാക്കളെയും പദ്മശ്രീ പുരസ്കാര ജേതാക്കളെയും സഭയിൽ അഭിനന്ദിച്ചു. ബിജെപി നേതാവും മുൻ ഉപപ്രധാനമന്ത്രിയുമായ എൽ.കെ അദ്വാനി, ബിഹാർ മുൻ മുഖ്യമന്ത്രി കർപ്പൂരി ഠാക്കൂർ എന്നിവർക്ക് ഭാരതരത്ന നൽകിയതിനെ സഭയിൽ പ്രത്യേകം അഭിനന്ദിച്ചു. കാർഷിക മേഖലയിലെ വിശിഷ്ട സേവനത്തിന് പദ്മശ്രീ പുരസ്കാരം ലഭിച്ച കർഷകൻ സഞ്ജയ് പാട്ടീലിനും ആശംസകൾ അറിയിച്ചു.
