മഥുര ശ്രീകൃഷണ ജന്മഭൂമി ക്ഷേത്രത്തിൽ ദർശനം നടത്തി നടി നവ്യാ നായർ. സോഷ്യൽ മീഡിയയിൽ പങ്കുവച്ച പോസ്റ്റിലൂടെ മഥുരയിലെത്തിയ അനുഭവം പങ്കുവയ്ക്കുകയായിരുന്നു താരം. “എന്റെ കൃഷ്ണൻ ജനിച്ച സ്ഥലം” എന്ന തലക്കെട്ടോടെയാണ് നവ്യ തന്റെ കുറിപ്പ് ആരംഭിക്കുന്നത്. മഥുരയിൽ കൃഷ്ണ, കൃഷ്ണ എന്നല്ല മറിച്ച് രാധേ രാധേ എന്നാണ് വിളിക്കുന്നതെന്നും നവ്യ പറഞ്ഞു. ക്ഷേത്ര ഗോപുരത്തിന് മുന്നിൽ നിന്നെടുത്ത ചിത്രങ്ങളും നടി പങ്കുവച്ചിട്ടുണ്ട്.
നവ്യയുടെ പോസ്റ്റ്:
എന്റെ കൃഷ്ണൻ ജനിച്ച സ്ഥലം ❤️❤️❤️
മഥുര !!! അതൊരു പറഞ്ഞറിയിക്കാൻ കഴിയാത്ത സന്തോഷവും നിർവൃത്തിയും തരുന്ന അനുഭവമായി .. അമ്പലം അടക്കാൻ 10 മിനിറ്റ് മാത്രം ബാക്കി ഉള്ളപ്പോൾ എത്തി .. ബാഗ് മൊബൈൽ ഒക്കെ ക്ലോക്ക് റൂമിൽ വെക്കണം സത്യത്തിൽ ആ പയ്യൻ സഹായിച്ചില്ലെങ്കിൽ വൈകിട്ട് 4 മണിക്ക് മാത്രമേ ദർശനം കിട്ടുമായിരുന്നുള്ളൂ ..
എല്ലാം ഭഗവാന്റെ ലീലകൾ .. നാരായണായ നമ:
പിന്നെ ഇവിടെ എല്ലാവരും കൃഷ്ണ കൃഷ്ണ അല്ല മറിച്ച് രാധെ രാധെ എന്നാണ്
ഞാനും ഏറ്റു വിളിച്ചു രാധെ രാധെ ..
എന്നാൽ താരത്തിന്റെ ക്ഷേത്ര ദർശനത്തെ വിവാദമാക്കുകയാണ് പലരും. കൃഷ്ണൻ ജനിച്ച സ്ഥലമെന്ന് എങ്ങനെ പറയുമെന്നും അത് സങ്കൽപ്പം മാത്രമാണെന്നുമാണ് നവ്യയുടെ പോസ്റ്റിന് താഴെ വിമർശനമുയരുന്നത്. രാഷ്ട്രീയ വിമർശനങ്ങളും പോസ്റ്റിന് താഴെ നിറയുന്നുണ്ട്. എന്നാൽ അതിന് മറുപടിയുമായി നടി രംഗത്തെത്തി. ഇത്തരം ചിന്താഗതികൾ തന്റെ പോസ്റ്റിന് താഴെ പറയേണ്ടതില്ലെന്നും ജാതിമത ഭേദമില്ലാത്ത കേരളമാണിതെന്നുംവിമർശനങ്ങൾക്ക് നവ്യ മറുപടി നൽകി.
