മലയാളികളുടെ സ്വന്തം ഉണ്ണിമുകുന്ദന്റെ വേറിട്ട കഥാപാത്രങ്ങളിലൊന്നായിരുന്നു മാർക്കോ ജൂനിയർ. ഹനീഫ് അദേനി സംവിധാനം ചെയ്ത് 2019ൽ പുറത്തിറങ്ങിയ സിനിമയിലെ ഉണ്ണിയുടെ വില്ലൻ കഥാപാത്രത്തെ മലയാളികൾക്ക് ഒരിക്കലും മറക്കാൻ സാധിക്കില്ല. ഉണ്ണിമുകുന്ദനെ വില്ലനായി ഏറ്റെടുത്ത പ്രേക്ഷകർ ഉണ്ണിയുടെ മാർക്കോ ജൂനിയർ എന്ന നായക വേഷത്തെ ഏറ്റെടുക്കാനുള്ള കാത്തിരിപ്പിലാണ്. ഇതിനിടയിലാണ് ചിത്രത്തിന്റെ പുതിയ വിശേഷം താരം ആരാധകർക്കായി പങ്കുവച്ചിരിക്കുന്നത്.
ഹനീഫ് അദേനിയുടെ സംവിധാനത്തിൽ പുറത്തിറങ്ങുന്ന ആക്ഷൻ ത്രില്ലർ ചിത്രമായ മാർക്കോയുടെ സംഗീതം ഒരുക്കുന്നത് രവി ബാസ്രൂരാണെന്ന സുപ്രധാന വിവരമാണ് ചിത്രത്തിന്റെ അണിയറ പ്രവർത്തകർ പങ്കുവച്ചിരിക്കുന്നത്. ഇതു സംബന്ധിച്ച പോസ്റ്റർ ഉണ്ണിമുകുന്ദനും സമൂഹമാദ്ധ്യമമായ ഫേസ്ബുക്കിലൂടെ പങ്കുവച്ചിട്ടുണ്ട്. കെ.ജി.എഫ് 1, കെ.ജി. എഫ് 2, സലാർ തുടങ്ങിയ സൂപ്പർഹിറ്റ് സിനിമകൾക്ക് സംഗീതം ഒരുക്കിയ വ്യക്തിയാണ് രവി ബാസ്രൂർ.
സിനിമയുടെ സുപ്രധാന വിവരം ഇന്ന് പങ്കുവയ്‌ക്കുമെന്ന് സിനിമയുടെ അണിയറപ്രവർത്തകർ അറിയിച്ചിരുന്നു. തുടർന്നാണ് രവി ബാസ്രൂരാണ് സിനിമയ്‌ക്ക് സംഗീതം ഒരുക്കുന്നതെന്ന വിവരം അണിയറപ്രവർത്തകർ പങ്കുവച്ചത്.
ബിഗ് ബജറ്റിൽ ഒരുങ്ങുന്ന ചിത്രം മലയാളം, തമിഴ്, തെലുങ്ക്, കന്നഡ ഭാഷകളിലായാണ് പുറത്തിറങ്ങുന്നത്. ഷരീഫ് മുഹമ്മദ്, അബ്ദുൾ ഗദാഫ് എന്നിവർ ചേർന്നാണ് ചിത്രം നിർമ്മിക്കുന്നത്. ക്യൂബ്സ് എന്റർടെയ്ൻമെന്റ്‌സും ഉണ്ണി മുകുന്ദൻ ഫിലിംസും ചേർന്നാണ് മാർക്കോ തിയേറ്ററുകളിൽ എത്തിക്കുന്നത്. ഉണ്ണിമുകുന്ദന്റെ വില്ലൻ വേഷം കണ്ട ആരാധകർ മാർക്കോ എന്ന നായകനെ സ്വീകരിക്കാനുള്ള ആവേശത്തിലാണ്. ചിത്രത്തിന്റെ കൂടുതൽ വിശേഷങ്ങൾ വരും ദിവസങ്ങളിലും പങ്കുവയ്‌ക്കുമെന്ന് അണിയറ പ്രവർത്തകർ പറഞ്ഞു.
