പാലക്കാട്: വേനൽ കടുത്ത പശ്ചാത്തലത്തിൽ മലയോര മേഖലകളിൽ നിരീക്ഷണം ശക്തമാക്കി വനംവകുപ്പ്. ഡ്രോണിന്റെ സഹായത്തോടെയാണ് വനംവകുപ്പ് അധികൃതർ നിരീക്ഷണം ശക്തമാക്കിയിരിക്കുന്നത്. മണ്ണാർക്കാട് ഫോറസ്റ്റ് റേഞ്ചിന്റെ പരിധിയിൽ ഉൾപ്പെടുന്ന കോട്ടോപ്പാടം, അലനല്ലൂർ, തെങ്കര, കരിമ്പ, തച്ചമ്പാറ എന്നീ പഞ്ചായത്തുകളിലാണ് പരിശോധന കർശനമാക്കിയിരിക്കുന്നത്.
നിലവിൽ അട്ടപ്പാടി, അഗളി മേഖലകളിലെ വനപ്രദേശങ്ങളിൽ പരിശോധന നടത്തിയതായി വനംവകുപ്പ് അറിയിച്ചു. കാട്ടുതീയുടെ ഭീഷണിയുള്ള ഇടങ്ങളിലും ചൂട് കൂടുന്ന സാഹചര്യത്തിൽ വന്യജീവികൾ കാടിറങ്ങാൻ സാധ്യതയുള്ളതുമായ മേഖലകളിലാണ് നിലവിൽ ഡ്രോൺ നിരീക്ഷണം ശക്തമാക്കിയിരിക്കുന്നത്.
മാർച്ച് അവസാനം വരെ ഡ്രോൺ നിരീക്ഷണം തുടരാനാണ് വനംവകുപ്പിന്റെ തീരുമാനം. അഞ്ച് കിലോമീറ്റർ അധികം ദൂരപരിധി ലഭ്യമാകുന്ന ഒന്നിലധികം ഡ്രോണുകളാണ് നിരീക്ഷണത്തിനായി ഉപയോഗിക്കുന്നത്.
