ഓറഞ്ച് ഇഷ്ടപ്പെടാത്ത ആളുകൾ വിരളമായിരിക്കും. വേനൽക്കാലമായതോടെ ഫലവർഗങ്ങൾ ഭക്ഷണത്തിൽ ഉൾപ്പെടുത്തേണ്ടത് അത്യാവശ്യമാണ്. ജ്യൂസായി കുടിക്കാനും അല്ലാതെ കഴിക്കാനും പലരും ഇഷ്ടപ്പെടുന്നത് ഓറഞ്ച് തന്നെയായിരിക്കും. വിറ്റാമിൻ സി, ആന്റിഓക്‌സിഡന്റുകൾ തുടങ്ങി ഓട്ടനവധി പോഷകഘടങ്ങൾ അടങ്ങിയിട്ടുള്ള ഫലവർഗമാണ് ഓറഞ്ച്. വേനൽക്കാലത്ത് ഓറഞ്ച് കഴിക്കുന്നത് ശരീരത്തിൽ ജലാംശം നിലനിർത്തുന്നതിനൊപ്പം പ്രതിരോധ ശക്തി വർദ്ധിപ്പിക്കുകയും ചെയ്യുന്നു. മുടിയുടെ ആരോഗ്യത്തിനും ചർമ്മത്തിന് തിളക്കമേകുന്നതിനും ഓറഞ്ച് പതിവായി കഴിക്കുന്നത് നല്ലതാണ്. ഇതിനുപുറമെ ദഹനപ്രശ്‌നങ്ങൾ അകറ്റി നിർത്തുന്നതിനും ഓറഞ്ച് സഹായിക്കുന്നു. എന്നാൽ നമുക്ക് തോന്നുന്ന സമയത്ത് ഓറഞ്ച് കഴിക്കുന്നത് ശരീരത്തെ ദോഷമായി ബാധിച്ചേക്കാം. ഇതറിഞ്ഞോളൂ..
ഭക്ഷണത്തിനൊപ്പമോ അല്ലെങ്കിൽ ഭക്ഷണത്തിന് ശേഷമോ ഫലവർഗങ്ങൾ കഴിക്കാൻ താത്പര്യപ്പെടുന്നവരായിരിക്കും നമ്മിൽ ബഹുഭൂരിപക്ഷം ആളുകളും. എന്നാൽ ഓറഞ്ച് ഭക്ഷണത്തിന് ശേഷം കഴിക്കുന്നത് പല ആരോഗ്യപ്രശ്‌നങ്ങളിലേക്കും വഴി വച്ചേക്കാം. സിട്രിക് ആസിഡ് ധാരാളം അടങ്ങിയിട്ടുള്ള ഫലവർഗമാണ് ഓറഞ്ച്. നാരാങ്ങ, കൈതച്ചക്ക തുടങ്ങിയവയിലും ഈ ആസിഡ് ധാരാളം അടങ്ങിയിരിക്കുന്നു. ഇങ്ങനെയുള്ള ഫലവർഗങ്ങൾ ഭക്ഷണത്തിന് ശേഷം കഴിക്കുമ്പോൾ ഇത് ദഹനപ്രശ്‌നങ്ങളിലേക്കും, വയറുവേദന, നെഞ്ചെരിച്ചിൽ, അസിഡിറ്റി, ശ്വാസതടസം തുടങ്ങിയവയിലേക്ക് വഴിവച്ചേക്കാം. ഭക്ഷണം കഴിച്ചതിന് ശേഷം ഓറഞ്ച് കഴിക്കുമ്പോൾ ഇതിലെ സിട്രിക് ആസിഡും മറ്റും വേഗത്തിൽ വിഘടിക്കുകയും ഇത് ഭക്ഷണത്തിനൊപ്പം കൂടിച്ചേർന്ന് വിഷാംശമുണ്ടാക്കുകയും ചെയ്യുന്നു. അതിനാൽ ഉച്ച ഭക്ഷണത്തിന് ശേഷമോ അത്താഴത്തിന് ശേഷമോ ഓറഞ്ച് കഴിക്കാതിരിക്കാൻ ശ്രദ്ധിക്കുക. രാവിലെ വെറും വയറ്റിൽ കഴിക്കാനോ അല്ലെങ്കിൽ പ്രഭാത ഭക്ഷണത്തിന് ശേഷം ഒന്നോ രണ്ടോ മണിക്കൂറുകൾ കഴിഞ്ഞോ ഓറഞ്ച് കഴിക്കാം. വൈകുന്നേരം ചായയ്‌ക്കു പകരമായി ഓറഞ്ച് കഴിക്കുന്നതും നല്ലതാണ്.
