ന്യൂഡൽഹി: നാലാംഘട്ട ഡൽഹി മെട്രോയുടെ രണ്ട് ഇടനാഴികൾക്ക് കൂടി തറക്കല്ലിട്ട് പ്രധാനമന്ത്രി നരേന്ദ്രമോദി. രാജ്യ തലസ്ഥാനത്തെ പൊതുഗതാഗതം ശക്തിപ്പെടുത്തുക എന്ന ലക്ഷ്യത്തോടെയാണ് രണ്ട് ഇടനാഴികൾക്ക് കൂടി ഡൽഹിയിൽ പ്രധാനമന്ത്രി തുടക്കം കുറിച്ചിരിക്കുന്നത്. ഇതോടെ ഡൽഹിയുടെ വിവിധ ഭാഗങ്ങളിലേക്കുള്ള കണക്റ്റിവിറ്റി മെച്ചപ്പെടുത്തുന്നതിൽ ഇടനാഴികൾ പ്രധാന പങ്ക് വഹിക്കും.
ലാജ്പത് നഗർ- സാകേത് ജി ബ്ലോക്ക്, ഇന്റർലോക്ക്- ഇന്ദ്രപ്രസ്ഥ എന്നീ പേരുകളിലായിരിക്കും ഇടനാഴികൾ അറിയപ്പെടുന്നത്. 20 കിലോമീറ്ററിലധികം വ്യാപിച്ചു കിടക്കുന്ന ഇടനാഴികൾ 8,399 കോടി ചെലവഴിച്ചാണ് നിർമ്മിക്കുന്നത്. ലാജ്പത് നഗർ- സാകേത് ജി ബ്ലോക്ക് ഇടനാഴി 8 കിലോമീറ്ററിലധികം ദൂരത്തിൽ വ്യാപിച്ചു കിടക്കുന്നു. ഇതിൽ 8 സ്റ്റേഷനുകളാണ് ഉൾക്കൊള്ളുന്നത്. 12 കിലോമീറ്ററിലധികം വ്യാപിച്ചു കിടക്കുന്ന ഇന്റർലോക്ക്-ഇന്ദ്രപ്രസ്ഥ ഇടനാഴിയിൽ 11കിലോമീറ്ററിലധികം ഭൂഗർഭ ലൈനുകളാണുള്ളത്. 10 സ്റ്റേഷനുകളാണ് ഇതിൽ ഉൾപ്പെടുന്നത്. ഹരിയാനയിലെ ബഹദൂർഗഡിലേക്കുള്ള കണക്റ്റിവിറ്റി വർദ്ധിപ്പിക്കാൻ ഇന്റർലോക്ക്- ഇന്ദ്രപ്രസ്ഥ ഇടനാഴികൾ സഹായിക്കുമെന്നതാണ് ഇതിന്റെ മറ്റൊരു പ്രത്യേകത.
ഇടനാഴികൾ വരുന്നതോടെ വിവിധ പ്രദേശങ്ങളിൽ നിന്നുള്ള ജനങ്ങൾക്ക് കിഴക്കൻ ഡൽഹിയിലേക്ക് എത്തിചേരുന്നതിൽ ഗതാഗത ബുദ്ധിമുട്ടുകൾ നേരിടേണ്ടി വരില്ല. 2026ഓടെ രണ്ട് ഇടനാഴികളുടെയും നിർമാണം പൂർത്തിയാകും.
