ന്യൂഡൽഹി: ഡൽഹി ക്യാപിറ്റൽസും റോയൽ ചലഞ്ചേഴ്‌സ് ബാംഗ്ലൂരും തമ്മിൽ ഏറ്റുമുട്ടുന്ന വനിതാ പ്രീമിയർ ലീഗ് ഫൈനലിനോടനുബന്ധിച്ച് സർവീസുകളുടെ സമയം നീട്ടി ഡൽഹി മെട്രോ. ഡൽഹിയിലെ അരുൺ ജെയ്റ്റ്‌ലി സ്റ്റേഡിയത്തിലാണ് ഫൈനൽ നടക്കുന്നത്. ഫൈനൽ കാണാനെത്തുന്നവർക്ക് യാത്രാ സൗകര്യം ഉറപ്പാക്കുന്നതിന് വേണ്ടിയാണ് മെട്രോ സർവീസുകളുടെ സമയക്രമത്തിൽ മാറ്റം വരുത്തിയിരിക്കുന്നത്.
ഡൽഹിയിൽ പുലർച്ചെ 12.15 വരെ മെട്രോ സർവീസുകൾ ഉണ്ടായിരിക്കും. എല്ലാ ലൈനുകളിലും ടെർമിനൽ സ്റ്റേഷനുകളിലും യാത്രക്കാർക്ക് സേവനങ്ങൾ ലഭ്യമാകും. മത്സരത്തിന്റെ സമാപന സമയം കണക്കിലെടുത്ത് സമയക്രമത്തിൽ കൂടുതൽ മാറ്റങ്ങൾ കൊണ്ടുവരുമെന്ന് അധികൃതർ വ്യക്തമാക്കി.
ഇന്ന് രാത്രി 7.30-നാണ് ഫൈനൽ നടക്കുന്നത്. ഡൽഹിക്കായി മിന്നു മണിയും ബാംഗ്ലൂരിനായി ആശാ ശോഭനയും കളത്തിലിറങ്ങും. മലയാളി താരങ്ങൾ നേർക്കുനേർ വരുന്നുവെന്ന പ്രത്യേകതയും ഡൽഹി- ബാംഗ്ലൂർ മത്സരത്തിനുണ്ട്. ഫൈനൽ മത്സരം സ്പോർട്സ് 18 ചാനലിലൂടെ സംപ്രേഷണം ചെയ്യും. ജിയോ സിനിമ ആപ്പിലും വെബ്സൈറ്റിലും മത്സരം തത്സമയം കാണാം.
