കോട്ടയം: ഉദ്ഘാടനങ്ങൾ ഉൾപ്പെടെയുള്ള പൊതു പരിപാടികളിൽ പങ്കെടുത്ത് ലഭിക്കുന്ന പണം ഫെഫ്ക്ക തൊഴിലാളി യൂണിയന് സമ്മാനിക്കുമെന്ന് നടി ഉർവശി. ഫെഫ്ക്ക തൊഴിലാളി യൂണിയൻ സമ്മേളനത്തിൽ സംസാരിക്കവെയാണ് നടിയുടെപ്രഖ്യാപനം. സിനിമാ ജീവിതത്തിൽ കൂടുതലും പ്രൊഡക്ഷൻ സെറ്റിലെ ചോറാണ് ഉണ്ടതെന്നും അതിനോടുള്ള നന്ദിയാണ് ഇത്തരം ഒരു തീരുമാനമെന്നും നടി വ്യക്തമാക്കി.
‘ ഉദ്ഘാടനങ്ങൾക്കും മറ്റു ചടങ്ങുകൾക്കും പൊതുവേ പോകാറില്ല. പോയാൽ തന്നെ അതിന് പ്രതിഫലം വാങ്ങാറുമില്ല. പലരും പ്രതിഫലം പറ്റിയാണ് പരിപാടികളിൽ പങ്കെടുക്കുന്നത്. ഇനി അത്തരം അവസരങ്ങൾ വരുമ്പോൾ ഞാൻ നിരസിക്കില്ല. അതിൽ നിന്ന് ലഭിക്കുന്ന തുക എത്രയായാലും അത് ഞാൻ നിങ്ങളെ ഏൽപ്പിക്കും’ – നിറഞ്ഞ കൈയടികൾക്കിടെ ഉർവശി പറഞ്ഞു.
നാൽപത് വർഷത്തെ സിനിമ ജീവിതത്തിലെ കൂടുതലും പ്രൊഡക്ഷൻ ഫുഡാണ് കഴിച്ചതെന്ന് പറഞ്ഞ ഉർവശി, ലാൽസലാം സിനിമയുടെ ലൊക്കേഷനിൽ വിശന്നു വലഞ്ഞതും പുളിശ്ശേരി കൂട്ടി ചൊറുണ്ടതെല്ലാം സദസിനോട് പങ്കുവെച്ചു.
