റെക്കോർഡ് കാഴ്ചക്കാരുമായി ഐപിഎൽ 17-ാം സീസണിന്റെ ഉദ്ഘാടന മത്സരം. സീസണിലെ ആദ്യ മത്സരമായ ചെന്നൈ സൂപ്പർ കിംഗ്സ് – റോയൽ ചലഞ്ചേഴ്സ് ബെംഗളൂരു പോരാട്ടം കണ്ടത് 16.8 കോടി പേരാണ്. ഡിസ്നി പ്ലസ് ഹോട്ട് സ്റ്റാറാണ് കാഴ്ചക്കാരുടെ എണ്ണത്തിലെ വർദ്ധന ഔദ്യോഗികമായി അറിയിച്ചത്. 1276 മിനിറ്റാണ് വാച്ച് ടൈം. ഐപിഎൽ ഉദ്ഘാടന മത്സരത്തിന്റെ ചരിത്രത്തിലെ തന്നെ എക്കാലത്തെയും ഉയർന്ന വ്യൂവർഷിപ്പാണിത്.
6.1 കോടി കാഴ്ചക്കാരാണ് ഒരേ സമയം ഡിസ്നിയിലൂടെ മത്സരം കണ്ടത്. ഇതും ഐപിഎൽ ഉദ്ഘാടന മത്സരത്തിലെ റെക്കോർഡ് ടിവി കൺകറസിയാണ്. ഐപിഎല്ലിന്റെയും ക്രിക്കറ്റിന്റെയും വളർച്ചയ്ക്ക് വേണ്ടിയുള്ള ബിസിസിഐയുടെ പ്രയത്നത്തിനും നന്ദി പറയുന്നുവെന്നും സ്റ്റാർ സ്പോർട്സ് വ്യക്തമാക്കി.
ഉദ്ഘാടന മത്സരത്തിൽ റോയൽ ചലഞ്ചേഴ്സ് ബെംഗളൂരുവിനെ ചെന്നൈ സൂപ്പർ കിംഗ്സ് തോൽപ്പിച്ചിരുന്നു. ആദ്യം ബാറ്റ് ചെയ്ത റോയൽ ചലഞ്ചേഴ്സ് ആറ് വിക്കറ്റ് നഷ്ടത്തിൽ 173 റൺസെടുത്തു. 18.4 ഓവറിൽ നാല് വിക്കറ്റ് നഷ്ടത്തിൽ ചെന്നൈ ലക്ഷ്യത്തിലെത്തി.
