പത്തനംതിട്ട: തെരഞ്ഞെടുപ്പ് ചട്ടലംഘന പരാതിയിൽ പത്തനംതിട്ട ലോക്സഭാ മണ്ഡലത്തിലെ ഇടത്മുന്നണി സ്ഥാനാർത്ഥി തോമസ് ഐസക്കിന് ജില്ലാ വരണാധികാരിയുടെ താക്കീത്. കുടുംബശ്രീയുടെ ഔദ്യോഗിക പരിപാടിയിൽ പങ്കെടുത്തത് ചട്ടലംഘനമാണെന്ന് ജില്ലാ വരണാധികാരി വ്യക്തമാക്കി.
ഇനി സർക്കാർ പരിപാടികളിൽ പങ്കെടുക്കരുതെന്ന് താക്കീത് നൽകിയാണ് തെരഞ്ഞെടുപ്പ് കമ്മിഷന് ജില്ലാ വരണാധികാരി റിപ്പോർട്ട് കൈമാറിയത്. തെരഞ്ഞെടുപ്പ് കമ്മീഷന് ലഭിച്ച പരാതികളുടെ അടിസ്ഥാനത്തിൽ തോമസ് ഐസക്കിന്റെ വിശദീകരണം കൂടി പരിശോധിച്ചശേഷമാണ്നടപടി.
പത്തനംതിട്ടയിൽ പ്രചാരണത്തിന് ആളെ കൂട്ടാനായി തോമസ് ഐസക്ക് നീക്കം നടത്തുന്നുവെന്ന് ആശാവർക്കർ കോർഡിനേറ്റർ പറഞ്ഞിരുന്നു. പ്രമാടം പഞ്ചായത്ത് പ്രസിഡന്റിന്റെ നിർദേശപ്രകാരം പൂങ്കാവിൽ യോഗം വിളിച്ചിട്ടുണ്ടെന്നും ഇതിൽ പങ്കെടുക്കണമെന്നും ആശാവർക്കറിന്റെ ശബ്ദസന്ദേശത്തിൽ പറയുന്നു. അങ്കണവാടി ജീവനക്കാരും ആശാവർക്കർമാരും പങ്കെടുക്കണമെന്നായിരുന്നു സന്ദേശം. ഇതിന് മുമ്പും കുടുംബശ്രീ പ്രവർത്തകരെയും തൊഴിലുറപ്പ് തൊഴിലാളികളെയും പ്രചാരണ പരിപാടികൾക്ക് പങ്കെടുപ്പിച്ചതിൽ തോമസ് ഐസക്ക് വിമർശനം നേരിട്ടിരുന്നു.