ജനുവരി 22നാണ് അയോദ്ധ്യയിൽ രാമക്ഷേത്രത്തിന്റെ പ്രതിഷ്ഠാ ചടങ്ങുകൾ നടന്നത്. അതിനു പിന്നാലെ രാം ലല്ലയെ ദർശിക്കാൻ ഭക്തജന പ്രവാഹമാണ് . അയോദ്ധ്യയിലെ ഓരോ ചിത്രങ്ങളും ഏറെ ശ്രദ്ധ നേടാറുമുണ്ട് . ഇപ്പോഴിതാ ചൂട് കൂടുന്നതിനാൽ കോട്ടൺ വസ്ത്രങ്ങൾ ധരിച്ച രാം ലല്ലയുടെ ചിത്രങ്ങളാണ് ശ്രദ്ധ നേടുന്നത് . ശ്രീറാം ട്രസ്റ്റാണ് ഇതിന്റെ ചിത്രങ്ങൾ പുറത്ത് വിട്ടത് .
പ്രകൃതിദത്ത വർണ്ണങ്ങൾ ചാലിച്ച് , കസവ് കൊണ്ട് അലങ്കരിച്ചാണ് വസ്ത്രങ്ങൾ തയ്യാറാക്കിയത്. കുറച്ച് ദിവസങ്ങളായി രാംലല്ല കോട്ടൺ വസ്ത്രം ധരിക്കുകയായിരുന്നുവെന്ന് ആചാര്യ സത്യേന്ദ്ര ദാസ് പറഞ്ഞു.
അതേസമയം രാമനവമി, സീതാ നവമി, ഹനുമാൻ ജയന്തി എന്നിവയും ഇത്തവണ ഗംഭീരമായി ആഘോഷിക്കുമെന്ന് ശ്രീരാമജന്മഭൂമി തീർഥക്ഷേത്ര ട്രസ്റ്റ് ജനറൽ സെക്രട്ടറി ചമ്പത് റായ് പറഞ്ഞു.രാമനവമി വേളയിൽ ദർശനത്തിനെത്തുന്ന ഭക്തരെ ചൂടിൽ നിന്നും സംരക്ഷിക്കാൻ മതിയായ ക്രമീകരണങ്ങൾ ഒരുക്കുന്നുണ്ട്. രാമജന്മഭൂമി സമുച്ചയത്തിലെ ദർശൻപഥ് ഉൾപ്പെടെയുള്ള സ്ഥലങ്ങളിൽ ജർമൻ ഹാംഗറുകൾ സ്ഥാപിക്കുന്നതിനും ചണ പരവതാനികൾ സ്ഥാപിക്കുന്നതിനുമുള്ള ജോലികൾ ആരംഭിച്ചു. എല്ലായിടത്തും കുടിവെള്ളം ലഭ്യമാക്കും.
