മയാമി ഓപ്പൺ കിരീടം സ്വന്തമാക്കി രോഹൻ ബൊപ്പണ്ണ- മാത്യു എബ്ഡൻ ജോഡി. ഹാർഡ് റോക്ക് സ്റ്റേഡിയത്തിൽ നടന്ന ഫൈനൽ പോരാട്ടത്തിൽ ക്രൊയേഷ്യയുടെ ഇവാൻ ഡോഡിക്-അമേരിക്കയുടെ ഓസ്റ്റിൻ ക്രാജിസെക്ക് സഖ്യത്തെയാണ് ഇരുവരും പരാജയപ്പെടുത്തിയത്. സ്കോർ 6-7 6-3 10-16
മയാമിയിൽ കിരീടം ചൂടിയതോടെ തന്റെ തന്നെ ലോകറെക്കോർഡും ബൊപ്പണ്ണ മറികടന്നു. 44ാം വയസ്സിൽ എടിപി സർക്യൂട്ടിൽ മാസ്റ്റേഴ്സ് കിരീടം നേടുന്ന ഏറ്റവും പ്രായം കൂടിയ വ്യക്തിയായി അദ്ദേഹം മാറി. കഴിഞ്ഞ വർഷം നടന്ന ഇന്ത്യൻ വെൽസ് മാസ്റ്റേഴ്സ് കിരീടം നേടി 43 ആം വയസ്സിൽ ബൊപ്പണ്ണ ഏറ്റവും പ്രായം കൂടിയ താരമായി റെക്കോർഡിട്ടിരുന്നു.
ലിയാൻഡർ പേസിന് ശേഷം ഒമ്പത് എടിപി മാസ്റ്റേഴ്സ് 1000 ഇനങ്ങളിലും ഫൈനലിൽ എത്തുന്ന രണ്ടാമത്തെ ഇന്ത്യൻ താരമെന്ന നേട്ടവും ബൊപ്പണ്ണയ്ക്ക് സ്വന്തമായി. ഈ വിജയത്തോടെ, ഇരുവരും പിഐഎഫ് എടിപി ലൈവ് ഡബിൾസ് ടീമുകളുടെ റാങ്കിംഗിൽ ഒന്നാം സ്ഥാനത്ത് തങ്ങളുടെ സ്ഥാനം ഉറപ്പിച്ചു. ഇതുവരെ 25 ഡബിൾസ് കിരീടങ്ങൾ ബൊപ്പണ്ണ നേടിയിട്ടുണ്ട്.
സെമി ഫൈനലിൽ സ്പെയിനിന്റെ മാർസെൽ ഗ്രാനോല്ലേഴ്സിനെയും അർജന്റെയ്ൻ പങ്കാളിയായ ഹൊറാസിയോ സെബല്ലോസിനെയും പരാജയപ്പെടുത്തിയാണ് ബൊപ്പണ്ണ-എബ്ഡൻ സഖ്യം ഫൈനലിൽ കടന്നത്.
