മത്സര ബുദ്ധിയോടെയാണ് ഇന്ന് ഏവരും ജോലിയെ സമീപിക്കുന്നത്. തങ്ങളുടെ മികച്ച പ്രകടനത്തിലൂടെ കമ്പനിയിൽ ശ്രദ്ധ നേടാനാണ് ഏതൊരു വ്യക്തിയും ശ്രമിക്കുന്നത്. ഇങ്ങനെ ആത്മാർത്ഥതയോടെ അധ്വാനിക്കുന്ന ജീവനക്കാരെയും കമ്പനിയുടെ വളർച്ചയ്‌ക്ക് കൈത്താങ്ങായവരെയും മനസിലാക്കാനും ഉചിതമായ പ്രതിഫലവും പാരിതോഷികവും അഭിനന്ദനവുമൊക്കെ നൽകി പ്രോത്സാഹിപ്പിക്കാനും കമ്പനികൾ ഇന്ന് മത്സരിക്കുകയാണ്. ബോണസുകൾ, വിനോദ യാത്രകൾ, മറ്റ് പ്രോത്സാഹന സമ്മാനങ്ങൾ എന്നിവ കമ്പനി ജീവനക്കാർക്ക് വേണ്ടി നൽകാറുണ്ട്.എന്നാൽ ചില സ്ഥാപനങ്ങൾ ഇതിൽ നിന്നും വ്യത്യസ്തമായി കാറുകൾ സമ്മാനമായി നൽകാറുണ്ട്. ഇങ്ങനെ മിടുക്കരായ ജീവനക്കാർക്ക് വില കൂടിയ കാറുകൾ സമ്മാനമായി നൽകുന്നത് അടുത്തിടെ ഉണ്ടായ ട്രെൻഡാണ്.
ഡീലർമാർക്കും ആകർഷകമായ സമ്മാനങ്ങൾ നൽകി ചില കമ്പനികൾ പ്രോത്സാഹിപ്പിക്കാറുണ്ട്. അടുത്തിടെ സിമന്റ് നിർമ്മാതാക്കളായ ജെകെ സിമന്റാണ് ഇത്തരത്തിലൊരു സമ്മാനം നൽകി ഡീലർമാരെ ഞെട്ടിച്ചത്. മികച്ച പ്രകടനം കാഴ്ചവെച്ച ഡീലർമാർക്കാണ് കമ്പനി ആകർഷകമായ സമ്മാനങ്ങൾ നൽകിയത്.മഹീന്ദ്ര XUV, Scorpio എന്നിവയാണ് ജെകെ സിമന്റ് ഡീലർമാർക്ക് സമ്മാനിച്ചത്. രാജ്യവ്യാപകമായി മികച്ച പ്രകടനം കാഴ്ചവച്ച 65 ഡീലർമാർക്കാണ് കാർ നൽകിയത്.
ജോലിയിൽ കാട്ടിയ മികവാർന്ന പ്രകടനത്തിനും കമ്പനിയുടെ വളർച്ചയ്‌ക്കായി പ്രവർത്തിച്ചതിനുമാണ് കാറുകൾ നൽകിയത്. ഡീലർ ശൃംഖലയുമായി ശക്തിയാർന്ന ബന്ധം സ്ഥാപിക്കുന്നതിനും പ്രതിഫലം ലഭിക്കുന്നതിനും പങ്കാളിത്തം ഉറപ്പു വരുത്തുന്നതിനുമാണ് ജെകെ സിമന്റ്‌സിന്റെ പുതിയ നീക്കം.
