ചാർ ധാം തീർത്ഥാടകർക്ക് രജിസ്ട്രേഷൻ നിർബന്ധമാക്കി ഉത്തരാഖണ്ഡ് സർക്കാർ. കേദാർനാഥ്, ബദരിനാഥ്, യമുനോത്രി, ഗംഗോത്രി, എന്നീ പ്രധാന നാല് തീർത്ഥാടന കേന്ദ്രങ്ങളിലേക്കുള്ള യാത്രയ്ക്കാണ് രജിസ്ട്രേഷൻ. ഏപ്രിൽ അവസാനം, അല്ലെങ്കിൽ മെയ് ആദ്യവാരത്തോടെ ആരംഭിക്കുന്ന ചാർ ധാം തീർത്ഥാടനം ഒക്ടോബർ – നവംബറോട് കൂടി പൂർത്തിയാകും. ഭാരതത്തിലെ തന്നെ വളരെ പ്രധാനപ്പെട്ട തീർത്ഥാടനങ്ങളിലൊന്നാണ് ചാർ ധാം യാത്ര. കേദാർനാഥ്, ബദരീനാഥ് ക്ഷേത്രങ്ങളിലേക്ക് മെയ് 10, 12 തീയതികളിലായി തീർത്ഥാടനം ആരംഭിക്കും. ഗംഗോത്രി ധാംമും മെയ് 10-നാണ് തുറക്കുക. എന്നാൽ
യമുനോത്രി ധാം തുറക്കുന്ന തീയതി ഇതുവരെ പ്രഖ്യാപിച്ചിട്ടില്ല. ചാർ ധാം തീർത്ഥാടനത്തിനായുള്ള ഒരുക്കങ്ങൾ ആരംഭിച്ചതായി ഉത്തരാഖണ്ഡ് സർക്കാർ അറിയിച്ചു.
തീർത്ഥാടനത്തിനായി എങ്ങനെ രജിസ്റ്റർ ചെയ്യാം….
https://regitsrationandtouristcare.uk.gov.in/ എന്ന വെബ്സൈറ്റിലൂടെയാണ് ചാർ ധാം യാത്രയ്ക്ക് രജിസ്റ്റർ ചെയ്യേണ്ടത്. നിലവിൽ അക്കൗണ്ട് ഉള്ളവർക്ക് ലോഗിൻ ചെയ്യുകയോ അല്ലാത്തവർക്ക് രജിസ്റ്റർ ചെയ്യുകയോ ചെയ്യാം. മുഴുവൻ പേരും ശരിയായ മൊബൈൽ നമ്പറും ഇമെയിൽ ഐഡിയും ടൈപ്പ് ചെയ്തെന്ന് ഉറപ്പുവരുത്തണം. പുതിയ അക്കൗണ്ട് ഉണ്ടാക്കുന്നതിന് ഒരു പാസ്വേഡും നൽകണം.
സൈൻ ഇൻ ചെയ്തുകഴിഞ്ഞാൽ രജിസ്റ്റർ ചെയ്തയാളുടെ പേരുള്ള ഡാഷ്ബോർഡ് കാണാൻ സാധിക്കും. ക്രിയേറ്റ്/ മാനേജ് യുവർ ടൂർ എന്ന ഓപ്ഷനിലൂടെ നിങ്ങൾക്ക് നിങ്ങളുടെ യാത്ര പ്ലാൻ ചെയ്യാൻ സാധിക്കും. ഇതിനായി യാത്രയുടെ സ്വഭാവം, പോകാൻ ആഗ്രഹിക്കുന്ന സ്ഥലങ്ങൾ, സഹയാത്രികരുടെ വിവരങ്ങൾ, തീയതികൾ തുടങ്ങിയവ നൽകണം.
ഇലക്ഷൻ തിരിച്ചറിയൽ കാർഡ്, ആധാർ കാർഡ്, ഡ്രൈവിംഗ് ലൈസൻസ് എന്നിവയുടെ സ്കാൻഡ് കോപ്പികളും അപ്ലോഡ് ചെയ്യണം.
അതോടൊപ്പം രജിസ്ട്രേഷൻ ഐഡി ഉൾപ്പെടുന്ന ഒരു എസ്.എം.എസ് മൊബൈലിലേക്ക് വരും. വെരിഫിക്കേഷന് ശേഷം ഒരു ‘യാത്രി’ സർട്ടിഫിക്കറ്റും ലഭിക്കും. കൂടുതൽ സഹായങ്ങൾക്കായി ഉത്തരാഖണ്ഡ് ടൂറിസ്റ്റ് കെയർ എന്ന ആപ്പും ഡൗൺലോഡ് ചെയ്യാവുന്നതാണ്.