ദുബായ്: വിഷുവിനെ വരവേൽക്കാൻ ഒരുങ്ങി യുഎഇയിലെ മലയാളികൾ. വിഷുവിന് ഒരു ദിവസം മാത്രം ബാക്കി നിൽക്കെ നിരവധി മലയാളികളാണ് സാധനങ്ങൾ വാങ്ങാൻ ഹൈപ്പർമാർക്കറ്റുകളിൽ എത്തുന്നത്. കൃഷ്ണ വിഗ്രഹവും കൊന്നപ്പൂവും, നിലവിളക്കും വിഷുക്കണിക്ക് ആവശ്യമായ എല്ലാം യു.എ.ഇയിലും ലഭിക്കും.
യുഎഇയിലെ ഹൈപ്പർമാർക്കറ്റുകളിലും പഴം, പച്ചക്കറി കടകളിലും തുണിക്കടകളിലും നാട്ടിലെ പോലെ തന്നെ വിഷു ആഘോഷിക്കാൻ വേണ്ടുന്നതെല്ലാം സജ്ജീകരിച്ചിട്ടുണ്ട്. കണിക്കൊന്നയും കണിവെള്ളരിയും ചക്കയും തൂശനിലയും മുതൽ കൈത്തറിയുടെയും പവർലൂമിന്റെയും സ്വർണ്ണ, വെള്ളി കസവുള്ള മുണ്ടുകളും സാരികളും ചുരിദാറുകളുമെല്ലാം ദിവസങ്ങൾക്ക് മുൻപ് തന്നെ നാട്ടിൽ നിന്നും എത്തിയിരുന്നു.
വിഷുവിനോട് അനുബന്ധിച്ച് പായസമേള അടക്കമുള്ള വിവിധ പരിപാടികൾ ഷാർജ ബുതീന ലുലു ഹൈപ്പർമാർക്കറ്റിൽ ഒരുക്കിയിട്ടുണ്ട്. വിഷുകേക്ക് ഇവിടുത്തെ മാത്രം പ്രത്യേകതയാണ്. ഈസ്റ്ററിനും ഈദുൽ ഫിത്റിനും പിന്നാലെ ഐശ്വര്യത്തിന്റെ കാഴ്ച നിറച്ചെത്തുന്ന വിഷു പ്രവാസലോകത്തും ഗംഭീരമാകും.
