ബയേൺ മ്യൂണിക്കിന്റെ 11 വർഷത്തെ ആധിപത്യം അവസാനിപ്പിച്ച് ബുണ്ടസ് ലിഗ കിരീടം നേടി ബയെർ ലെവർക്യൂസൻ. സീസണിൽ ഇനിയും അഞ്ച് മത്സരങ്ങൾ ബാക്കി നിൽക്കെയാണ് ലെവർക്യൂസൻ തങ്ങളുടെ കന്നികിരീടം സ്വന്തമാക്കിയത്. 2011-12 സീസണിൽ ബൊറൂസിയ ഡോർട്ട്മുണ്ടിന് ശേഷം ബുണ്ടസ്ലിഗ കിരീടം നേടുന്ന ആദ്യ ടീമാണ് ലെവർകൂസൻ.
സാബി അലോൻസോയുടെ ലെവർക്യൂസൻ എതിരില്ലാത്ത അഞ്ച് ഗോളുകൾക്ക് വെർഡർ ബ്രെമനെ തോൽപ്പിച്ചാണ് കിരീടം ഉറപ്പിച്ചത്. ഫ്ലോറിയൻ വിർട്സിന്റെ ഹാട്രിക് ഗോളുകൾ ലെവർക്യൂസന്റെ വിജയത്തിന് ഇരട്ടി മധുരം പകർന്നു. 25-ാം മിനിറ്റിലാണ് ലെവർക്യൂസന്റെ ആദ്യ ഗോൾ. ജോനാസ് ഹോഫ്മാനെ പെനാൽറ്റി ബോക്സിനുള്ളിൽ വീഴ്ത്തിയതിന് ലഭിച്ച പെനാൽറ്റി വിക്ടർ ബോണിഫേസ് ഗോളാക്കി മാറ്റി. 38-ാം മിനിറ്റിൽ അമിൻ അഡ്ലിയും ലെവർക്യൂസനായി വലകുലുക്കി. ഫ്ലോറിയൻ വിർട്സ് (68,83,20) മൂന്ന് തവണ പന്ത് ലക്ഷ്യത്തിലെത്തിച്ചു.
29 മത്സരങ്ങൾ പൂർത്തിയാക്കുമ്പോൾ 25 ജയം ഉൾപ്പടെ 79 പോയിന്റാണ് ബയെർ ലെവർക്യൂസനുള്ളത്. രണ്ടാം സ്ഥാനത്തുള്ള ബയേൺ മ്യൂണിക് 29 മത്സരങ്ങളിൽ നിന്ന് 63 പോയിന്റ് നേടി.1993ന് ശേഷം ഇതാദ്യമായാണ് ലെവർക്യൂസൻ ഒരു കിരീടം സ്വന്തമാക്കുന്നത്. ഒരു സീസണിൽ ഏറ്റവുമധികം തോൽവിയറിയാത്ത മത്സരങ്ങൾ എന്ന ബുണ്ടസ് ലിഗ റെക്കോർഡും ബയെർ ലെവർക്യൂസൻ സ്വന്തമാക്കി.
