പൃഥ്വിരാജും ബേസിൽ ജോസഫും പ്രധാന വേഷത്തിലെത്തുന്ന ഗുരുവായൂരമ്പല നടയിൽ എന്ന ചിത്രത്തിന്റെ ടീസർ റിലീസ് ചെയ്തു. ചിത്രം ഫാമിലി എന്റർടെയ്നർ ആയിരിക്കുമെന്നാണ് ടീസറിൽ നിന്നും ലഭിക്കുന്ന സൂചന. ഒരു വിവാഹവുമായി ചുറ്റിപ്പറ്റി നടക്കുന്ന സംഭവ വികാസങ്ങളെ നർമ്മത്തിൽ ചാലിച്ച് അവതരിപ്പിക്കുന്നതാണ് സിനിമയെന്ന് ടീസർ സൂചിപ്പിക്കുന്നു.
ടീസറിനൊപ്പം ചിത്രത്തിന്റെ റിലീസ് ഡേറ്റും അണിയറപ്രവർത്തകർ പങ്കുവച്ചിട്ടുണ്ട്. മേയ് 16-നാണ് ചിത്രം തിയേറ്ററിലെത്തുന്നത്. ‘ജയ ജയ ജയ ജയ ഹേ’ എന്ന ചിത്രത്തിന് ശേഷം വിപിൻ ദാസ് സംവിധാനം ചെയ്യുന്ന ചിത്രമാണ് ‘ഗുരുവായൂരമ്പല നടയിൽ’. പൃഥ്വിരാജ്, ബേസിൽ ജോസഫ്, അനശ്വര രാജൻ, മുകേഷ്, നിഖില വിമൽ, തമിഴ് ഹാസ്യതാരം യോഗി ബാബു തുടങ്ങിയവർ പ്രധാനവേഷത്തിലെത്തുന്ന ചിത്രമാണിത്.
ദീപു പ്രദീപാണ് രചന നിർവ്വഹിച്ചിരിക്കുന്നത്. ഛായാഗ്രഹണം നീരജ് രവിയാണ് നിർവഹിക്കുന്നത്. പൃഥ്വിരാജ് പ്രൊഡക്ഷൻസിന്റെ ബാനറിൽ സുപ്രിയ മേനോൻ, ഇഫോർ എന്റർടൈൻമെന്റ് ബാനറിൽ മുകേഷ് ആർ മേത്ത, സി വി സാരഥി എന്നിവർ ചേർന്നാണ് ചിത്രം നിർമ്മിക്കുന്നത്.
