ഇതിഹാസതാരവുo ബൊറൂസിയ ഡോർട്ട്മുണ്ടിന്റെ അറ്റാക്കിംഗ് മിഡ്ഫീൽഡർ മാർക്കോ റിയൂസ് ക്ലബ്ബുമായുള്ള ബന്ധം അവസാനിപ്പിക്കുന്നു. സീസൺ അവസാനിക്കുന്നതോടെ താൻ ക്ലബ്ബ് വിടുമെന്നും കരാർ പുതുക്കില്ലെന്നും അദ്ദേഹം അറിയിച്ചു. 2012-ൽ മുതൽ തുടർച്ചയായ 12 വർഷം ഡോർട്ട്മുണ്ടിനായി ബൂട്ടണിഞ്ഞ താരമാണ് മാർക്കോ റിയൂസ്. ഡോർട്ട്മുണ്ടിനായി 424 മത്സരങ്ങളിൽ നിന്ന് 168 ഗോളുകളാണ് 34-കാരൻ നേടിയത്.
രണ്ട് ജർമ്മൻ കപ്പ് കിരീടം ഉൾപ്പെടെ നാല് കിരീടങ്ങളും ക്ലബ്ബിനൊപ്പം അദ്ദേഹം നേടി. കരാർ നീട്ടേണ്ടതില്ലെന്ന് ക്ലബ്ബും ഞാനും തീരുമാനിച്ചു. തന്റെ ജീവിതത്തിന്റെ പകുതിയിലേറെയും ക്ലബ്ബിന് വേണ്ടിയാണ് ചെലവഴിച്ചത്. ഇത്രയും വർഷം ടീമിനെ പ്രതിനിധീകരിക്കാൻ ആയതിൽ സന്തോഷമുണ്ടെന്നും ഈ യാത്രയെ കുറിച്ച് പറയാൻ വാക്കുകൾ കിട്ടുന്നില്ലെന്നും റിയൂസ് വീഡിയോ സന്ദേശത്തിൽ പറഞ്ഞു. താരത്തിന്റെ പുതിയ ക്ലബ്ബ് എതേന്നത് വ്യക്തമല്ല.
അതേസമയം, യുവേഫ ചാമ്പ്യൻസ് ലീഗ് സെമിഫൈനലിലെ ആദ്യ പാദത്തിൽ കരുത്തരായ പിഎസ്ജിയെ എതിരില്ലാത്ത ഒരു ഗോളിന് ബൊറൂസിയ ഡോർട്ട്മുണ്ട് തോൽപ്പിച്ചിരുന്നു. നിക്ലാസ് ഫുൾക്രഗ് നേടിയ ഗോളാണ് ഡോർട്ട്മുണ്ടിന്റെ ആദ്യപാദ ജയത്തിന് വഴിയൊരുക്കിയത്.
