വൈവിധ്യമാർന്ന സംസ്‌കാരങ്ങളുടെയും പാചക പാരമ്പര്യത്തിന്റെയും നാടാണ് നമ്മുടെ ഭാരതം. നമുക്ക് ഇഷ്ടമുള്ളതെന്തും കഴിക്കാനുള്ള അവകാശം ഇവിടെ ഉണ്ടെങ്കിലും ജനങ്ങളുടെ ആരോഗ്യവും സുരക്ഷയും മുൻനിർത്തി ഫുഡ്‌സേഫ്റ്റി ആൻഡ് സ്റ്റാൻഡേർഡ് അസോസിയേഷൻ ഓഫ് ഇന്ത്യ നിരവധി കാരണങ്ങൾ കൊണ്ട് നിരോധിച്ച ചില ഭക്ഷണങ്ങൾ നമ്മുടെ രാജ്യത്തുണ്ട്. അവ ഏതെല്ലാമെന്ന് അറിയാം..
ചൈനീസ് പാലും പാലുത്പന്നങ്ങളും
2008ൽ ഭക്ഷ്യസുരക്ഷാ വകുപ്പ് നിരോധിച്ച ഭക്ഷണങ്ങളാണ് ചൈനീസ് പാലും ഇതുപയോഗിച്ചുള്ള പാലുത്പന്നങ്ങളും. അമിത അളവിലുള്ള മെലാനിൻ, ശരീരത്തിന് ഹാനികരമാകുന്ന കെമിക്കലുകൾ എന്നിവ ചേർത്താണ് ഇവ നിർമിക്കുന്നതെന്ന് പരിശോധനയിൽ കണ്ടെത്തിയിരുന്നു. ഇതിനുപുറമെ ഈ ആഹാരങ്ങൾ കഴിച്ചവരിൽ പല ആരോഗ്യ പ്രശ്‌നങ്ങളും റിപ്പോർട്ട് ചെയ്തിരുന്നു. ഇത് മുൻനിർത്തി 2008ൽ ചൈനീസ് പാലുത്പന്നങ്ങൾ ഇന്ത്യയിൽ നിരോധിച്ചു.
പൊട്ടാസ്യം ബ്രോമേറ്റ്
2016ൽ ഭക്ഷ്യസുരക്ഷാ വകുപ്പ് നിരോധിച്ച ഭക്ഷണങ്ങളിൽ ഒന്നാണ് പൊട്ടസ്യം ബ്രോമേറ്റ്. ബ്രെഡുകൾ പോലുള്ളവയിലായിരുന്നു ഇവ അമിതമായി ചേർത്തിരുന്നത്. എന്നാൽ ഗവേഷകർ നടത്തിയ പഠനങ്ങളിൽ പൊട്ടാസ്യം ബ്രോമേറ്റിന്റെ അമിത ഉപയോഗം തൈറോയ്ഡ് കാൻസറിലേക്ക് വഴിവയ്‌ക്കുമെന്ന് കണ്ടെത്തുകയായിരുന്നു. ഇതോടെ ബ്രെഡ്, ബേക്കറി ഉത്പന്നങ്ങൾ എന്നിവയിൽ പൊട്ടാസ്യം ബ്രോമേറ്റ് ഉപയോഗിക്കരുതെന്ന കർശന നിർദേശം ഭക്ഷ്യസുരക്ഷാ വകുപ്പ് നൽകി.
റെഡ് ബുൾ എനർജി ഡ്രിംഗ്
പൊതുവെ എല്ലാവർക്കും അറിയുന്നതും നിലവിൽ വിൽക്കപ്പെടുന്നതുമായ എനർജി ഡ്രിങ്കാണ് റെഡ് ബുൾ. എന്നാൽ ഇത് 2006ൽ ഭക്ഷ്യ സുരക്ഷാ വകുപ്പ് ബാൻ ചെയ്ത പാനീയമാണ്. ഇവയിൽ അമിതമായി അടങ്ങിയിട്ടുള്ള കഫൈൻ എന്ന പദാർത്ഥം ആരോഗ്യപ്രശ്‌നങ്ങൾക്ക് വഴിവയ്‌ക്കുമെന്ന് കണ്ടെത്തിയിരുന്നു. രക്തസമ്മർദ്ദം വർദ്ധിപ്പിക്കുന്നതിലേക്കും, നിർജ്ജലീകരണത്തിനും, ഹൃദയമിടിപ്പ് വർദ്ധിപ്പിക്കുന്നതിനും ഈ പാനീയം കാരണമാകുന്നു. ഇതേത്തുടർന്നാണ് ഇവ ഇന്ത്യയിൽ നിരോധിച്ചത്. നിലവിൽ നിയന്ത്രണങ്ങൾ പാലിച്ചാണ് ഈ പാനീയങ്ങൾ വിൽക്കപ്പെടുന്നത്.
വന്യമൃഗങ്ങളുടെ ഇറച്ചികൾ
മൃഗസംരക്ഷണ നിയമപ്രകാരം കാട്ടുമൃഗങ്ങളെ വേട്ടയാടുന്നതോ ഇവയുടെ ഇറച്ചി വിൽക്കുകയോ ചെയ്യുന്നത് രാജ്യത്ത് ശിക്ഷാർഹമാണ്. അതിനാൽ ഇന്ത്യയിൽ വന്യമൃഗങ്ങളുടെ ഇറച്ചി വിൽക്കുന്നതിനും പാചകം ചെയ്യുന്നതിനും വിലക്കേർപ്പെടുത്തിയിരിക്കുന്നു.
