2024-ലെ കാൻ ഫിലിം ഫെസ്റ്റിവലിൽ ഛായാഗ്രഹണത്തിലെ പിയറി ആൻജെനിയക്സ് എക്സൽലെൻസ് പുരസ്കാരം സ്വന്തമാക്കി സന്തോഷ് ശിവൻ. ഛായാഗ്രഹണ കലയിലെ അസാധാരണമായ സംഭാവനകൾക്കാണ് അദ്ദേഹത്തെ ആദരിച്ചത്. ഈ അഭിമാനകരമായ നേട്ടം സ്വന്തമാക്കുന്ന ആദ്യത്തെ ഏഷ്യക്കാരൻ കൂടിയാണ് സന്തോഷ് ശിവൻ. തന്റെ അടുത്ത സുഹൃത്തായ സന്തോഷ് ശിവന് ലഭിച്ച നേട്ടത്തിൽ സന്തോഷം പ്രകടിപ്പിച്ചിരിക്കുകയാണ് മോഹൻലാൽ.
“Cannes2024-ൽ ചരിത്രം സൃഷ്ടിക്കപ്പെടുന്നതിന് സാക്ഷിയാകുന്നതിൽ ആവേശമുണ്ട്! ഛായാഗ്രഹണത്തിലെ പിയറി ആൻജെനിയക്സ് എക്സൽലെൻസ് നേടിയ ആദ്യത്തെ ഏഷ്യൻ എന്ന നിലയിൽ ചരിത്രം സൃഷ്ടിച്ച ഞങ്ങളുടെ പ്രിയപ്പെട്ട സന്തോഷ് ശിവന് അഭിനന്ദനങ്ങൾ! ലോകത്തിന് മുന്നിൽ അവതരിപ്പിക്കാൻ ഞങ്ങൾക്ക് കാത്തിരിക്കാൻ കഴിയാത്ത വിധം ബറോസിനെ ചിത്രീകരിച്ച അദ്ദേഹത്തിന്റെ വൈദഗ്ദ്ധ്യത്തിൽ അഭിമാനിക്കുന്നു” എന്ന് മോഹൻലാൽ പ്രതികരിച്ചു.
കാൻ ഫിലിം ഫെസ്റ്റിവലിൽ ഒരു പ്രമുഖ അന്തർദേശീയ ഫോട്ടോഗ്രാഫി ഡയറക്ടറെ ആദരിക്കുന്ന അവാർഡാണ് ഛായാഗ്രഹണത്തിലെ Pierre Angénieux ExcelLens . 2013 ലാണ് പുരസ്കാര വിതരണം ആരംഭിച്ചത്. റെട്രോഫോക്കസ് സൂം മെക്കാനിസം കണ്ടുപിടിച്ച, ഹൈ-എൻഡ് സൂം ലെൻസുകളുടെ നിർമ്മാതാവുമായ Pierre Angénieux- ൽ നിന്നാണ് ഈ പേര് വന്നത്.
